Manipur-a AR pahnih thah chhuinaah mi pahnih man tawh

Manipur-a AR pahnih thah chhuinaah mi pahnih man tawh
Assam Rifles lambuna pahnih thah leh mi panga inhliamna chhuina kal zelah Manipur-ah mi pahnih man an ni a, an lirthei man ni ngeia hriat van pawh Mutum Yangbi, Imphal-ah hmuh a ni tawh bawk.
Heng mite leh an lirthei hi sipai an beihna atanga km 12 dawna hlaah hmuh chhuah an ni a. Police chuan lirthei hi a neitu an tam hle a, an zavaiin tute nge an nih hriat vek an ni tawh tih an sawi.
“Darkar 24 liam ta chhung khan state pumah boruak a tang hle a; mahse, thunun vek a ni tho va. Nambol Sabal Leikai-a Assam Rifles sipai pahnih an martar hnuah khan venhim hna thawktuten Shantipur leh Ishok-ah beihpui an thlak zui a ni,” an ti.
Zirtawpnia Manipur khawpui, Imphal daia an chuanna truck tê chi beihnaa thi Assam Rifles sipaite hi Naib Subedar Shyam Gurung leh Rifleman Ranjit Singh Kashyap te an ni a. Thuneitute chuan a beitu mi firfiakte hian 407 Tata-a Patsoi company base atanga Nambol base an pan laiin tlai dar 05:50 velah an lo kap tih an sawi a. Tun hnaia Prime Minister Narendra Modi-a’n Manipur a tlawh khan he kawngpui hi a zawh nghe nghe.
“Nambol Sabal Leikai-ah tute nge an nih hriat lo mi firfiakten kawngpuiah sipai an lambun a. He thil thlengah hian Assam Rifles pahnih martarin pangain hliam an tuar bawk,” tiin sorkarin thu a chhuah.
Hliam tuar sipaite hi Imphal-a Regional Institute of Medical Sciences (RIMS)-ah enkawl nghal an ni.
Inrinni tuk khan Governor Ajay Kumar Bhalla-a kaihhruaiin hmun him lo deuh bik laia venhimna tihchak dan tur sawiho nghal a ni a. Sorkar mi pawimawh tak tak leh police lalte an tel.
“Thil sual titute chhui chhuah thuai thuai an nih theih nan venhim hna thawktu pawl hrang hrangte an inpawh zawk theih dan tur ruahman a ni a. Hmun him lo thei zual lai, kawngpui, hmun lun zual leh ramri hrula venhimna tichak lehzual dan turte pawh sawiho a ni,” tiin Raj Bhavan chuan thu a chhuah.
Manipur-ah hian kum 2023 atang khan Meitei leh Kuki inkarah buaina a chhuak a. Mi 260 chuang thi awm tawhin mi 50,000 dawn mahni in chhuahsana himna tur hmun dang pan an awm.