Manipur-a awm duh lote’n sorkar ram hman tum

Manipur-a awm duh lote’n sorkar ram hman tum
Churachandpur district-a Zo hnahthlakte intelkhawmna Indegenous Tribal Leaders Forum (ITLF) te’n Ningani khan martar thenkhat vuiliam an tum a, sorkar ramah an ruang hi phum an tum. Manipur sorkar hnuaia awm an duh loh avangin an huam chhunga sorkar ram pawh an chang turah an ngai a ni.
Tun buainaa nunna chan mi 35-te thlahna hun hman a, Lamka-a sorkar ram (sericulture department ram) chu martarte thlanmual atana hman tumin, mi 35-te ruang pawh hi hetah hian phum an tum.
‘Manipur-a awm kan duh tawh lo a. Tin, tunah hian sorkar nei lo ang kan ni a, Manipur sorkar hian an hnuaia awmah min ngai lo. Chuvangin sericulture department ram pawh hi kan duh anga hmang thei turah kan inngai a ni,” ITLF hruaitu pakhat chuan a ti.
Sericulture ram hi office atana hman a ni a, a dung ft 500 vel, a vang ft 100 vel a ni. ITLF chuan he hmun hi martarte thlanmual atana hman an tum a, tuna mi 35-te bakah martar dang pawh phum an tum.
ITLF hian tun buainaah hian Zo hnahthlak lamah mi 130 chuangin nunna an chan tawh tiin an chhinchhiah a, district palia mi an ni. Kangpokpi district-ah vuiliam tawh an awm a, mi dang chu mitthi dahna hmun hrang hrangah an awm.
Churachandpur district-a Zo hnahthlakte chu ITLF-ah hian an intelkhawm a, Kangpokpi district-a mite chu Committee on Tribal Unity (CoTU) tiin an intelkhawm. District pahnih hi Zo hnahthlak hlang awmna ve ve a ni a, ITLF leh CoTU hi tun buainaina a hrin chhuah ve ve a ni. Zo hnahthlak hlang an nih lohna district pahnih a awm a; Chandel district-ah chuan Kuki Chief Association, Chandel pawlin hma an hruai a, Tengnoupal district-ah Hill Tribe Council-in hma an hruai.
ITLF hruaitute chuan Ningani-a vui an tum martar 35-te hi post mortem tih tawh, dan hnuaia tihfel ngaite tihfel tawhte an ni an ti a, martar dangte pawh tihfel ngaite tihfel hunah Lamka-a sericulture department ram hi neiha he hmuna vui zel hi an tum tih an sawi.
Zo hnahthlak hlangte ram Churachandpur leh Kangpokpi district-ahte hian DC office leh SP office tih loh sorkar office dang chu an kal mumal lo a, an inkhar deuh vek tia sawi theih a ni. Zirlaite pawh an chawl a, Churachandpur leh Kangpokpi district-ah chuan board exam hmachhawn tur pawl 10 leh pawl 12 zirlaite zing karah te class an kal a, mi dang chu an chawl tih thu dawn a ni.