Manipur sorkar chuan an state-a chi leh chi inkara buaina chhuak avanga mahni in leh lo tlanchhiatsan chhungkaw 10,000 chuanga mi 40,000 vel chu March 31 chu an awmna pangngaia kirtir leh hman an tum tih Chief Secretary Puneet Kumar Goel-a’n a sawi.
Goel-a’n Ningania thu a chhuahah hian chhungkaw 3,700 vel, mi 16,500 chu tun thlengin an awmna ngaiah an awmtir leh tawh tih a sawi bawk.
State sorkara hotu berin thu a chhuah hma ni chiah hian Supreme Court chuan May, 2023 atanga hnam hnih inkara tharum thawhna thleng tuartute chhawmdawl leh tanpuina thawhin awmzia a neih dan zir chiang tura judge chawl tawhte awmna high-powered committee a din term chu July 31 thleng a pawt sei ve chiah bawk.
July, 2023-a Supreme Court-a thu thehluh a nih hnuah court sang ber hian Manipur dinhmun hi a thlithlai reng a, mihringin a mamawh pek te, chhawmdawl leh tanpuina kalpui dante a ngaihven reng a ni.
Goel-a’n thu a chhuahah hian state-level committee-in buaina tuartute chhawmdawlna kalpui dan hi a vil a, district level-ah pawh hmalak dan ennawn fo a nih thu a tar lang.
“Sorkarin a tum ber chu zawi zawia tlanchhiate an awmna ngaia lettir te, nunphung pangngaia an awma zirna leh khawsak dan pangngai an neih leh theihna tura hmalak a ni a. Sorkar hian a hmathlir zauhvin tlanchhiate hi relief camp-a an khawsakna ngaihtuah, zirna leh an thatna tur tihsak aiin camp atanga an in ngeia sawn turin hma a la mek a ni,” a ti.
“December, 2025 thleng khan chhungkaw 2,200 chuanga cheng mi 10,000 chuang chu an awmna ngaiah kirtir leh an ni a. Hemi tur hian Special PMAY-G (Pradhan Mantri Awas Yojana-Gramin) hnuaiah in 7,000 vel chhe vekte sak that hna thawh a ni a, he hmalakna hi zawh tawh leh zawh fel chiah lo a la awm a, thawh mek zel a ni,” a ti.
Thuchhuahah hian hmun hrang hranga tlanchhiate hawtir lehna tur hian Rs. vaibelchhe 1,124 pekchhuah tawh a nih thu tar lan a ni.
“Sorkar chuan tlanchhia chhungkaw 10,000-a cheng mi 40,000 chuang chu March 31, 2026-ah hawtir a tum a. Sorkar hian a hun tak leh him taka an kir vek theihna turin theihtawp chhuahin a bei mek zel a ni,” tiin thuchhuahah hian tar lan a ni.
Tar lan tawh thin angin Manipur-ah hian May 3, 2023 khan court-in Meitei-te Scheduled Tribe-a telh ve tura a tih atangin buaina a chhuak tan a. State pumah tharum thawhna thlengin mi sang telin an in leh an tlanchhiatsan a, thenkhat chu ramngawah chengin thenkhat chu thenawm state-ah an tlanchhe bawk a. Nikum February 13 atang khan Manipur hi President’s Rule hnuaiah a awm mek bawk.
Meitei leh Kuki intihbuainaah hian mi 260 chuang thi awmin hnam hniha mi 60,000 chuang baihvaiin an awm phah a. State chhung hmun hrang hrangah relief camp siamin an khawsa a, eng emaw zat chu state pawnah an la khawsa bawk.
Manipur-a baihvai chhungkaw 10,000-te March-ah hawtir tum
