Manipur-a bank pakhat bulah puak thei thil chhar

Manipur-a bank pakhat bulah puak thei thil chhar
Manipur-a Imphal West district-ah Nilaini khan bank bulah hand grenade hmuh a ni a. Bishnupur district-ah pawh puak thei dang hmuh a ni bawk tih police-in an sawi.
Leikai-a Singjamei Mayengbam-a ICICI Bank branch bul maiah hand grenade hi hmuh niin sawi a ni a. Nambol-a Kangla Foods bulah puak thei dang hi hmuh a ni bawk.
Heng puak thei hmuh chhuah hi Manipur sorkarin invauna nena mi thil chhuhsakna thleng thin tihtawp tuma hma a lak mek lai a ni.
Singjamei Police Station-a sub-divisional police officer (SDPO) kaihhruaiin bank hi thlen nghal vat a ni a, grenade hi ICICI Bank branch luhna kailawnah hmuh a ni.
‘Bomb hi zing dar 8:00 velah kea tei velin an hmu a. Kawngka hawnna vawn chhan a lo awm lo va, bomb disposal squad koh niin him takin an la sawn thei a, chawhma dar 10:00 velah seng fel a ni,’ tiin officer chuan a sawi. He thilah hian chhui zui turin thubuai ziah luh a ni.
‘Grenade hi puak duh tak, No. 36 hand grenade a ni a. Tuin nge dah tih leh engvanga dah nge a nih tih chu hriat mai theih a la ni lo va, invauna leh tihluihnaa mi thil chhuhsak tumna a ang,’ tiin officer chuan a sawi bawk.
Hetih lai hian Kangla Foods, Nambol, Bishnupur district-a puak thei hmuhah hian intihthaihna lehkha dah tel a ni a, ‘Phone number dahah hian darkar 24 chhungin lo bia ang che u, hei hi manager tan vauna hnuhnung ber a ni,’ tih a inziak.
Bomb hi him taka hmun danga lak sawn niin dan anga hma la zui tura buaipui zui nghal a ni bawk.
Manipur-ah hian nikum May thla atanga hnam leh hnam intihbuaina chhuak mek zelah boruak a tang hle a. Tun hnaiah phei chuan Kuki leh Meitei inkara inepna boruak hi a sang lehzual hle a. Nilainia puak thei hmuhte hi he buaina kaihhnawih ngei hi a nih rin a ni.