Manipur-a kum thum hnua buatsaih Sangai Festival chhimtu tlem

Manipur-a kum thum hnua buatsaih Sangai Festival chhimtu tlem
Manipur sorkarin kum tin a buatsaih thin, Sangai Festival chu chi leh chi inkara buaina avanga kum thum buatsaih a nih tawh loh hnuah kuminah tharthawh leh a ni a, buaina avanga baihvaia awm mekten an duh lohna karah chhimtu pawh an tlem hle niin thuneituten an sawi.
Kum 2022 kha May, 2023-a chi leh chi inkara buaina a chhuah hmaa an buatsaih hnuhnung ber niin ni 10 chhung awh kût hi mi nuai 2.19 velin an chhim a. Kuminah erawh November 21 atanga tan kha Inrinni khan zovin mi 1,000 bawr velin ni tin tlawh ang chauh an ni a, a vai pawhin mi 8,000-9,000 vel chauh an ni.
Kût huaihawt duh lotu an awm avangin buaina chhuak thei veng turin venhimna pawh khauh taka kalpui a ni.
Buaina chhuak avanga an in leh lo chhuahsana baihvaia awm mek, internally displaced people (IDP)-te hi an chenna in pangngaia let leh duhin police nen pawh an lo intibuai fo tawh thin a. Mipui pawl dangte nen sorkar chu an state-a nunphung pangngai a awm leh hma chu kût buatsaih rih lo turin an duh a ni.
Kût hmanna pui ber, Imphal East district-a Hapta Kangjeibung-ah chuan thutna a ruak nasain stall hawnte pawh tlawhtu awm lova inhawng an tam hle.
Ei tur zuar, Thai Gangmei chuan, “Stall thenkhat chu dawrtu an awm loh avangin an inkhar a. Min dawrtute pawh a hmuna thawk leh sorkar mi pawimawh, he hmuna duty an ni ber a. State pawn atanga lo kala rawn inhawngte tan phei chuan hlawkna a awm mang lo vang,” a ti.
November 21 khan Governor Ajay Kumar Bhalla-a’n kût hi hawngin ‘an state-a nunphung leh mawina pho chhuahna, mahni kutkawih thil siam zawrhna leh khualzin hipna tur’ tiin sawi mah se chutiang chu an pha lo hle tih a lang.
Bhalla-a hian an state mipuite chu kûtin a tum inpumkhatna vawng nunga tel theuh turin sawm mah se chhimtu an tam lo hle a ni.
Kût hman chhunga ngaihhlut hlawh ber tling thin, Inrinni zana concert-ah British band ‘Blue’ an zau a, hetah pawh hian entu an tam hluai chuang lo niin thuneitu pakhat chuan a sawi.
Churachandpur leh Imphal East district-a baihvaia la awm mek bakah zirlai leh mipui pawlte chuan kawng hrang hrangin kût buatsaih an duh lohna hi an lo lantir tawh hlawm bawk.
Kût buatsaih chhung hian baihvaia awm mekte hian an ina haw leh an tum a, Imphal East district-a Yaingangpokpi leh Pukhao Terapur-ah leh Bishnupur district-a Phougakchao Ikhai-ah venhim hna thawktute nen pawh an innawr nual.
Venhim hna thawktuten mittui tlakna hlo hmanga an phutnaah baihvaia awm zinga mi 10 chuangin hliam tenau an tuar nghe nghe.
Manipur-a May, 2023-a Imphal Valley-a cheng Meitei leh an thenawm tlangrama cheng, Kuki-te inkara buaina chhuakah hian mi 260 chuang thi awm tawhin mi sang tel mahni in leh lo chhuahsanin an tlanchhia a ni.