Hmarchhak state hrang hranga zirlai pawlte intelkhawmna North East Students’ Organisation (NESO) thuneitu sangin a lo rel tawh angin, November 9 (Ningani) khan hmarchhak state tinah zirlai pawl ten Manipur-a buainaah inremna tluantling a awm an duh zia lantirin sit-in demonstration neih a ni.
Mizoramah pawh NESO member Mizo Zirlai Pawl chuan he hun hi a hmang a. Aizawl Vana Pa Hall kawta hun hmanah MZP president H Lalthianghlima chuan Manipur tualchhung buaina in vawiin thlenga ziaawm lam a la pan thei lo chu pawi an ti takzet tih sawiin, buaina chinfel thuai a nih theih nan sawrkar laipuiin hma la se an duh a, ralthlir mai mai lo turin an phut tih a sawi.
“He buaina chinfel a nih theih nan Prime minister ngei pawh a hmunah kalin hma la se kan duh a. Mizoram sawrkar thar kan neih veleh kan chief minister tharin rang takin hma la se, a hmun pawh tlawh ngei se kan duh a ni,” a ti.
NESO vice chairman Ricky Lalbiakmawia chuan Manipur buaina chuan a daihrei ta hle a, sawrkar laipuiin chinfel tum loa a thlirliam mai mai chu NESO-in a dem takzet a. Tan bik neia an hmalakna titawp tur leh buaina tireh thuai tura an duh avangin punkhawm hi huaihawt a ni tih a sawi.
North East Students Organisation hnuaiah hian zirlai pawl 8 – Khasi Students’ Union, All Assam Students’ Union, Naga Students’ Federation, Mizo Zirlai Pawl, Twipra Students’ Federation, All Manipur Students’ Union, Garo Students’ Union leh All Arunachal Pradesh Students’ Union an awm a ni.
Manipur-a remna duhna NESO huaihawtin lantir
