Manipur-a tharum thawhna thlengah mi pali thi
Thla eng emaw zat chhung boruak a daih viau hnuah India hmarchhaka Manipur-ah Thawhlehnia buaina chhuak lehah mi pali an thi a, an zinga pahnih hi police silai hmet puaha thi niin thuneituten an sawi.
Meitei tamna, Bishnupur district-a in pakhatah bomb puak vangin Hindu Meitei naupang pahnih an thi tih thuneitute leh chief minister office chuan an sawi.
A hnuah venhim hna thawktute awmna (camp) luhchilh tum mipuite chu a hnawh darh nan silai hmeh puah a ni a, mi pahnih an thi niin state Home Minister Govindas Konthoujam-a’n a sawi.
May, 2023 khan Manipur-a mi cheng tam zawk, Hindu Meitei leh Kristian Kuki hnamte inkarah eibara hamthatna leh hnaa chanpual neih chungchangah buaina a chhuak tan a. Mi 260 vêl an thi tawh a, mi 60,000 chuang an in leh lo tlanchhiatsan an awm tawh bawk.
Buaina chhuak thar naupang thite hi Meitei an ni a, an hnampuite chuan Kuki helho tih niin an sawi a. Kuki-te chuan an pha ve thung.
Chief Minister Yumnam Khemchand Singh-a chuan pawikhawihtute hi hriat chian an la ni lo tih sawiin, bomb puak hi ‘remna awm mek tihbuai duhtu mi mal emaw, pawl emaw tih’ a nih thu a sawi.
Thuneitute chuan an khawpui, Imphal leh a chhehvelah curfew an puang nghal a, internet pawh ni nga chhung an titawp lailawk a ni bawk.
Manipur-a tharum thawhna thlengah mi pali thi
