Army tena drone leh helicopter nena an vil rengna nen Manipur-ah boruak dai zual zelin Pathianni khan Churachandpur-ah chuan zing lam dar 7 atanga dar 10 inkar chhung curfew thlah dul a ni a, hetih chhung hian eitur leh damdawi leh mmawh hrang hrangte lakkhawm nana hman a ni.
Zing dar 10-a curfew chhunzawm leh veleh Army leh Assam Rifles te chuan flag march an nei zui nghal a. Manipur-ah hian Army column 120-125 vel tirh luh a ni.
|henkhat sawi dan chuan sipai, paramilitary leh central police force 10,000 vel tirh luh niin an sawi.
Chief Minisetr N. Biren Singh chuan assembly constituency tinah peace committee dinin remna lama hmalakna chu grassroot level-ah kalpui a ni ang a ti bawk a.
Defence thuchhuah chuan community hrang hrang atangin civilian 23,000 chuang chu chhanchhuah niin a thente chu military garrison chhungah him taka awm tir an ni a ti a.
Manipur buaina hi Meitei community tena Scheduled Tribe (ST) status an dil duhlohna avanga hill district sawm laia ‘Tribal Solidarity March’ neiha buaina chhuak atanga intan a ni ber a.
Manipur-ah hian Meitei tam berin 53% vel an ni a, a tam ber te chu Imphal Valley ah an cheng a ni. Tribals- Nagas leh Kukis te chuan population atanga 40% vel hauhin hill district-ah an cheng thung.
“Army leh Assam Rifles column 120-135 tena chauh hre lova tun hnai darkar 96 chhung thawka community hrang hranga civilian te chhanchhuak a, tharumthawhna hmet mit a, thil pangngaia a awm leh theih nana theihtawp an chhuahna avangin tharumthawhna lian tham a awm lo va, curfew pawh zing lam dar 7 atanga dar 10 inkar hawn a ni, he mi hnu hian Churachandpur-ah flag march neih zui a ni ang,” tiin sipaite thuchhuah chuan a tarlang.
“Tun hnai darkar 24 chhungin army-te chuan surveillance nasa taka kalpuiin aerial surveillance te neih niin UAVs te bakah army helicopter-te chu Imphal Valley-ah a tir lut a ni. Civilian 23,000 chhanchhuahin an awm tawh a, heng mite hi military garrison a dah an ni,” tiin a sawi.
May 3 a tharumthawhna chhuahna hmun Churachandpur-ah pawh May 6 khan tlai lam dar 3-5 chhung curfew thlahdul a ni bawk.
“Churachandpur district-ah dan leh hrai lekkawhna lam dinhmun a tha zel a, State sorkar leh stakeholder hrang hrang tena inhmuhkhawmna neih hnuah curfew pawh thlahdul deuh a ni,” tiin May 6 khan Chief Minister N. Biren Singh chuan a sawi bawk.
Singh hian all-party meeting kovin tharumthawhna chhuak chungchang sawihona neih a ni a. “Meeting neihnaah state-ah remna leh muanna a awm theih nan leh buaina leh nghelnghehlohna thleng a awm zui loh nan khua leh tuite chu ngen ni se,” tih a ni bawk a. He meeting-ah hian political party hrang hrang Congress, CPI, JD(U), NPF, Shiv Sena, TMC, BSP, AAP, MPP, AIFB, MNDF, ABHKP te pawhin aiawh an tir vek a.
“Assembly constituency tinah peace committee din ni se, grassroot level-ah remna a awm theih nana hmalak ni se,” tiin an sawi bawk.
Manipur buaina hi Churachandpur-a Torbung area-ah tharumthawhna intan hmasa berin All Tribal Student Union Manipur (ATSUM) tena May 3 a Meiteis tena Scheduled Tribe (ST) status an ngen duhlohna lantira ‘Tribal Solidarity March’ an lantir atanga irhchhuak a ni.
He march-ah hian tribals- Nagas leh Kukis te pawh an tel a, Manipur High Court-in State sorkar chu thla kaltaa Meitei community tena ST status an dilah Centre-ah recommendation thawn tura a tih hnua thleng vek a ni.
Torbung-a march neih lai hian ralthuam keng mithenkhate chuan Meitei community mi leh sate an bei an ti a, chu chu duh lovin valley district a chengte chuan phuba la zuiin chu chuan State a fan chhuak zui a ni, tiin police-te chuan an sawi.
Tharoor-an Centre sawisel
Senior Congress leader Shashi Tharoor chuan Manipur voters te chuan BJP-te rorela an siam hnu lawkah phatsan nia inngaihna a neihtir tia sawiin Manipur-a tharumthawhna nasa tak thleng avangin President’s rule-a dah a ngiat bawk.
Tharoor chuan, “Manipur-ah tharumthawhna nasa tak a thlen laiin Indians ngaihtuahna fimte chuan khawiah nge good governance intiam chu a awm tiin zawhna an siam a ni,” tiin a sawi a.
“Thuneihna chantira BJP te dah lal an nih hnu kum khat lekah Manipur voters-te chuan phatsanah an inngai a. President’s Rule a dah hun a ni a, State sorkar hian thlan tlin an nihna angin an tih tur an ti thei lo,” tiin Union Minister hlui chuan a sawi bawk.