Manipur a zohnahthlakte leh meitei te kara buaina chhuak chuan zual lam pan leh zelin, Jiribam district-ah mi parukin nunna an chan leh a, an zingah hian naupang leh hmeichhiate pawh an tel avangin nunphung a buai leh tawh hle.
Imphal valley hmun thenkhatah chuan sipai tam zawk dah belh an nih bakah, anmahni pui tur hian Assam Rifle thahnem tak tirh an ni bawk tih report thenkhat chuan a tarlang a, minister thenkhat chenna in beih a ni bawk tih a sawi.
Buaina chhuakin zual lam a pan leh avangin Manipur sorkar chuan curfew puangin, an state chhungah internet an tih thih thu a sawi a, chief minister N Biren Singh chu beih tuma vau an awm nia sawi a ni bawk.
Kar hmasa lam khan zohnahthlak mi 10 chuan nunna chanin, hei hian meitei huatna a chawk tho thar hle a, a hma lawkin Hmar nu pakhat rawng taka thah a lo awm bawk nen, an boruakin zual lam a pan chho leh nasa hle tawh a ni.
Lok Sabha opposition leader leh congress hruaitu Rahul Gandhi chuan prime minister Narendra Modi chu Manipur buaina hmet mit thuai tura a duh thu sawiin, a rang thei ang bera Manipur tlawh turin a phut a, Manipur buaina a zual leh avang hian central chuan hna hmanhmawhthlak a neih thu a sawi chhuak leh bawk.
Manipur-ah curfew puang, internet titawp bawk
