Manipur-ah nasa takin mi anglo thah duh lohna lantir

Manipur-ah nasa takin mi anglo thah duh lohna lantir
Manipur-a Imphal West district-ah rilru lama mi pha lo mipa pakhat rawng taka thahna thleng avangin lungawi lohna nasa taka lantir a ni.
Thawhlehni khan kar hmasa atanga a chin hriat lohva a awm, kum 34 mi, Chesam Abdul Kadir-a ruang chu luikamah tawih chhe tawh taka hmuh niin police-in rawng taka thah niin an ngai a, mipui thinrim an inhawr khawm zui a ni.
Kadir-a hi Nilainia bo tawh kha niin thil rua puha sawisak a nih hnuah Meitei pawl, Arambai Tenggol member-te hnenah hlan a ni.
A chhungte chuan engmah a ru lo nia sawiin Kadir-a hi rilru kim lo niin sorkar laipui hnuaia Unique Disability ID (UDID)-ah leh Manipur Social Welfare Department-a inziak lut niin a rilru lamah a chian lohna chu 65% tling niin chhinchhiah a ni.
A unaupa (cousin), Mohd Farooq Chesam-a chuan, “Kan nu leh pate tih loh chuan a tawng pawh an hre tha thei lo va, miin a tawng hi an hre thei ngai lo,” a ti a. “June 10 khan in a chhuahsan a. CCTV atanga a lan dan chuan zan rei tawh takah Paobitek Mayai Leikai a kai a. A hnuah km thum chuanga hlaah sawisak a ni a, Arambai Tenggol Unit-23 hnenah hlan a ni tih kan hre ta a ni,” a ti.
Nilaini khan Wangoi Police Station-ah thubuai ziah luh a ni a, Thawhlehni khan a chhungte hnenah a thi tih hrilh an ni a, a ruang hi Nambul River bulah phum a ni tih an hrilh bawk a. A ruang hi executive magistrate, forensic expert leh a chhungte hriatpuinain lak chhuah leh a ni.
“Dikna kan duh a. Engtin nge mi anglo hi rukrua puha hetianga thaha phum a nih theih?” tiin Farooq-a chuan a sawi.
A chin hriat a nih hnuah Joint Action Committee (JAC) din nghal a ni a. JAC member leh mi chengte chu thukhawmin a titu man a nih hma chu a ruang pawh lak loh an ti a. Dikna hlen chhuah a nih hma chuan lungawi lohna hi lantir zel a ni dawn tih an sawi.
Police chuan he thil thlengah hian Arambai Tenggol member telin mi pakua man an ni tawh tih an sawi a. Thuneitute chuan chhui me zel niin a inhnamhnawih chu na taka hrem an ni dawn tih an sawi.
Dan kengkawhtute chuan mipuite chu thu dik lo thehdarh lo tur leh chhui hna thawh a nih lai chuan muanawm taka thil ti turin an ngen.