Manipur-ah ralthuam tam tak leh hel panga man

Manipur-ah ralthuam tam tak leh hel panga man
Rocket-propelled grenade (RPG) leh gelatin telin Manipur-a venhim hna thawktute chuan Republic Day lawm tura an inbuatsaih mek laiin ralthuam leh puak thei dang eng emaw zat an man a, mi pawisa chhuhsak leh dan bawhchhiatna dang kaihhnawiha hel panga an man bawk.
Venhim hna thawktute chuan Thawhtannia Repiblic Day lawm turin venhim hna thawktute an inbuatsaih a, hmun hrang hrang an dapnaah ralthuamte hi an hai chhuak tih Pathianni khan an sawi.
Republic Day lawmna tihbuai theih vengin checkpoint-ah an duty ngawr a, hmun hrang hrang dap leh fan kual an ngah tih an sawi.
Hetih lai hian hel pawl pasarih chuan January 25 zan lai atang khan Republic Day lawna boycott nan darkar 18 awh bandh an huaihawt mek a. Pawl paruk telna, Coordination Committee (CorCom) chuan January 26 hi Manipur tan ‘mi thuhnuaia awpa awm ni’ angin an sawi a. Socialist Revolutionary Party of Kangleipak (SOREPA) chuan Republic Day zing dar 05:00 leh tlai dar 05:00 inkarah total bandh an kalpui mek bawk.
Manipur police control room chuan Inrinni khan Churachandpur, Imphal West leh Imphal East district hmun hrang hrang an dap tih an sawi a. Churachandpur district-a Loilamkot leh Nalon inkarah ralthuam an hai chhuak tih an sawi a. An ralthuam hmuhte hi RPG pathum, 30mm grenade panga, tualchher laipui (pumpi) pathum leh a mu pathum a ni tih an sawi.
Imphal West district-a Waheng Khuman Mamang Leikai-ah hand grenade chak tak pathum, mortar bomb pali, improvised explosive device pakhat leh puak thei dang kg khat vel an hai chhuak bawk.
Imphal East district veka Naotrok tlangdung thuthmunah double-barrel breech-loading (DBBL) silai pakhat, tualchher 9 mm pistol pakhat leh a magazine ruak, hand grenade chak tak pahnih, practice rifle grenade pakhat, INSAS rifle magazine pahnih, silaimu 20 leh bulletproof helmet pakhat, bulletproof cover pahnih leh thir plate pahnih an hai chhuak bawk.
Hmun dangah thu an dawn bawhzuiin mi pawisa chhuih luih leh dan bawhchhiatna dang vangin hel pawl hrang hranga mi panga an man a. Inrinni khan People’s Revolutionary Party of Kangleipak (Progressive), PREPAK (Pro) an tih bawka tel pahnih chu SL Zoungam, Tengnoupal district-ah an man.
Inrinni vek khan Kangleipak Communist Party (Taibangnganba)-a tel mipa pakhat chu Kekrupat-ah manin a mobile phone kawl lai an laksak.
Ningani kal ta khan Buraikhal leh Lower Kharkhuplien, Pherzawl district-ah mipa pahnih an man atangin gelatin tlawn 30, a deh puahna, metre 20-a sei safety fuse wire, pawisa Rs. nuai 1.02, Bolero var leh mobile phone pahnih an man bawk.
Police chuan an state-a dan leh thupek kenkawhna tibuai thei bakah mi pawisa chhuhsak leh dan lova chetna dang thleng thei vengin theihtawp an chhuah tih an sawi.