Manipur-ah ruihhlo leh ralthuam man
Venhim hna thawktuten October 17 leh 24 inkara tangruala Manipur-a beihpui an thlaknaah mi hring manin ruihhlo leh ralthuamte pawh an man tel tih thuneituten an sawi.
Indian Army chuan Assam Rifles leh Manipur Police nena tangruala beihpui an thlaknaah hian tlangram leh phaizawla awm hel pawla tel mi pahnih an man a, pistol leh a mu pahnih bakah zu litre 500 an lan tih an sawi.
An man hmasak zawk hi October 17-ah niin Pangaltabi, Kakching-ah niin pakhat dang hi United Kuki National Army (UKNA)-a tel, Haominthang Haokip-a a ni a, Churachandpur-ah October 24 khan an man thung.
Venhim hna thawktute hian hetiang beihpui thlak hi hel pawl tihtawp tumna leh dan leh thupek kenkawh a chak zawk theih nan an kalpui zel dawn tih an sawi a. Manipur-ah hian chi leh chi inkara buaina zualpuiin reh lam pan tawh mah se a khât tawkin tharum thawhna a thleng leh thin a ni.
Hetih lai hian chief minister hlui, N Biren Singh-a chuan an state sorkar chu Manipur–Mizoram ramriah venhimna tikhauh turin a ngen a, Mizoramah hian dan lova awm tam tak um chhuah an ni a, hengte hi an state-ah an lut thei niin a sawi.
Ningol Chakouba kûta hun a hmannaah an state-ah hian Imphal West-a cheng ringawt pawh mi 2,000 vel awmna tur mumal nei lovin an la awm niin a sawi a. Mizoramah ram leilung fa ni lo um chhuah an nih mek karah an state-ah tam zawk an luh theih thu Singh-a hian a sawi a ni.
“Kan mihringpuite chunga tih tul ang thilah chuan rei lo te an lo awm chu phalsak tur an ni a; mahse, tunge an nih tih fiahna erawh a tul a ni,” tiin state leh sorkar laipui hnuaia venhim hna thawktute an tanrual a ngai hle niin a sawi.
Manipur-ah ruihhlo leh ralthuam man
