Zo Reunification Organization hriat danin, Manipur-a Zofate leh Meitei inkara buainaah Zofa 124 chuangin nunna an chan tawh a, chin hriat loh 60 chuang an la awm mek.
ZORO Gen. Hqrs. sawi danin, India sawrkar atangin Manipur buaina chingfel turin chanchin lawmawm engmah a awm thei loa, a dik thei ang ber hriat a duh avangin Fact Finding Committee on Manipur Disturbance a din a, an member secretary Dr Lalrinawmi Ralte chu Lamka-ah tirin, a hnen atanga thu thar ber, July 8 thlenga chhinchhiah chin an hriatah, he buaina kaihhnawiha Zofa nunna chan chu 124 an chuang tawh a, hliam damdawi ina enkawl 377, an chin la hriat loh 60 chuang, khaw hal 290, in hal 7247, biak in & quarters hal 357, raltlan 41425, ITLF Relief Camp Lamka bika awm 110 an ni.
ZORO hruaitute chuan Manipur buaina a avanga Zofate thlavang hauhna, tawrhpuina leh sunna hun hmanga punkhawm chu Nilaini chhun dar 12:00 hian Vanapa Hall kawtah an buatsaih dawn a; he hun hmanpui tur hian Zofa zawng zawng an sawm tih an sawi.
Manipur chief minister Biren Singh leh a thawhpui minister leh an party lama mite bakah Meitei khawtlang hruaitute chuan Zofate leh Meiteite chu inrema chenho an duh lo tih ZORO hruaitute chuan sawiin, a chhe thei ang bera puhin an ram chuhpui leh dan loa pemlut, tia dawt hmanga an puh thu an sawi.
Zofate a hnam anga nuai bo an tum mekna atanga damkhawchhuak tura an beihnaah leh Manipur rorelna laka la hrang tura India sawrkar an ngen mek chu an thlawp tih an sawi bawk.
Manipur-ah tribal 124 thi tawh
