Jiribam district-a Zairawn khuaah Meitei-in rawng takin Zosangkim Hmar an tihlum a, chumi hnuah rammua chhuak mi 10-in nunna an chan leh. Hei hian mipui rilru a tina a, Manipur-a Zo hnahthlakte rilru a na hle.
Zosangkimi hi November ni 7-ah a thi a, hemi hnu hian Manipur-a Zofate leh Meitei an inkap nasa leh. Zairawn khuaa kal Zofa volunteer mi 10-in nunna an chan leh a, CRPF te’n an lo lambun vanga thi an ni. Heng thil thleng hi Zo hnahthlakte’n na an ti a, tunlaia an titi ber pawh a ni tih thu dawn a ni.
“Mipui rilru a na a, thil dang kan sawi thei lo a ni ber. ‘Keini hi a zaidawh zawkah kan tang char char a, anni lam an rawng em em a,’ tiin an sawi sup sup mai,” an hruaitu pakhat chuan a ti.
Zairawn-a kal, an haw lama nunna chan ta mi 10 hi Lamka khawpuia cheng vek an ni a, pakhat phei chu Lamka-a veng pakhat Varpakawt lal fapa a ni.
Thawhlehni khan nunna chante hi an in theuhvah khawtlangin hun an hmanpui a, thu dawn danin, khawhar inlenpui danin an zaipui a, thu an sawi a, an tawngtai bawk.
Nunna chante ruang hi Mizoram atanga lakluh an duh a, khaw hrang hrangah lo hmuah an tum. Lamka an thlenin an in theuhva luhpui phawta lumenpui an tum bakah Peace Ground-ah a tuka anmahni thlahna hun hman an tum.
Tun hnaiah an boruak a lo dai hman a, kar hmasa Ningani atangin an boruak hi a lum leh. Zo hnahthlakte hian an boruak a daih deuh lai pawhin mahni khua theuh vengin an duty reng a, volunteer-te’n ‘training’ an nei reng bawk.
An hruaitute sawi danin, volunteer lam an indaih a, hmun hrang hrangah duty turin an inthlak kual reng.
An boruak a lum leh avang hian buh an seng thei rih lo a, mahse Meitei lam pawhin buh hi an seng thei chuang lo.
Manipur-ah Zofate rilru na
