Manipur sorkar chuan buaina thleng thil liantham paruk chhui chiang turin Central Bureau of Investigation (CBI) a ti a. Chutihlaiin Ministry of Home Affairs (MHA) pawhin Manipur hnenah hian rehabilitation package Rs 101.75 crore a pe nghal bawk.
A hma in Nilaini khan Union Home Minister chuan May 3 atanga intibuai tan tawh Kuki leh Meitei community te inkara lei dawhtu an nih tur thu a lo sawi tawh bawk.
Hetihlai hian Naga legislator pakhat chuan, “Home Minister nena meeting neihnaah remna leh muanna a awm theih nana hmalakna tur tam tak sawiho a ni a. Naga MLA te chu Kuki leh Meitei inkara palaia State a remna leh muanna a awm theih nana hmala tura tih an ni” tiin a sawi bawk.
Manipur Assembly ah hian seat 60 a awm a, seat 40 chu Meitei MLA te an ni a, 10 chu Kuki MLA te leh Naga in MLA 10 an nei bawk a. Kuki MLA te rorel lai Bharatiya Janata Party (BJP) a awm te chuan seperate administration an ngiat a, Nagas MLA te erawhin ngawih an chuh thung. Hill district paruk curfew puan ve lohna te hi Naga te chenna a ni deuh vek a ni.
CBI te chhui tura tih case paruk zingah hian conpsiracy case atanga ethnic violence chu pre-plan a ni em tih te pawh a tel a.
June 3 thleng khan Manipur-ah First Information Reports (FIR) 3,734 a l;ut tawh a. May 3 atanga buaina Kuki leh Meitei community te inkara chhuakah nunna chan 100 chaung an awm tawh a ni. Case ziahluh tam ber 1,257 te chu Imphal West district a ziahluh niin, Kangpokpi ah 932, Bishnupur ah 844 ziah luh niin Chief Minister’s office chuan a tarlang.
“Heng case paruk te hi Manipur sorkar in a thurchhuaha CBI te chhui chiang tura a tihte chu an ni” tiin Manipur senior government official chuan a sawi a. Official chuan MHA chuan Department of Personnel Training (DoPT) hnenah CBI chhuichian tir turin a lo ti tawh a ti bawk a. “DoPT chuan CBI hnenah hrilh tawhin case te chu chhuichian vat a ni ang” tiin official chuana sawi bawk.
Kuldiep Singh, security adviser to the Manipur government chuan Niangnai khan Manipur ah thil duhawm lo a thleng lo tia sawiin darkar 48 chungin engmah thil duhawm lo thleng a awm loh thu a sawi a.
“Manipur mipui te chhawmdawlna kalpui nan MHA chuan Rs 101.75 crore releif package a pechhuak” tiin Singh chuan a sawi bawk a. May 29 atanga June 1 chhunga Home Minister in Manipur a tlawh lai khan State sorkar chu MHA hnenah relief package pekna turin ngenna thlen turin a lo ti tawh a. Tun buaina avang hian in leh lo tlanchhiatsan 35,000 vel an awm tia sawi a ni.
Singh chuan Nilaini thleng khan silai 28 hmuhlet belh a nih thu sawiin silai 27, ammunition 245 leh bomb 41 te chu Porompat Police Station huamchhung Imphal East district ah hmuhchhuah a ni a, Bishnupur district ah pawh ralthuam pakhat leh bomb pahnih hmuhchhuah belh a ni bawk a. “Vawiin thlegnin silai 896, ammunition 11,763 leh bomb hrang hrang 200 hmuhbelh a ni tawh” tiin Singh chuan a sawi bawk a. May 3 a buaina chhuah atang khan Manipur a police armoury leh camp atangin silai leh ralthuam 4,000 chuang lakchhuahin a awm a ni.
Manipur security advisor chuan curfew pawh valley district panga ah darkar 12 atan thlahdul a ni a, hill distrist ah darkar 8 atanga 10 thlahdul a ni a ti bawk a.
“Nitin mamawh leh chakkhai phur te chu NH-27 ah an lut reng a, vehicle ruak 294 te chuan Jiribam panin Imphal an chhuahsan a a. Vehicle thil phur 220 in Noney chhuahsanin tank leh truck 198 in Jiribam an chhuahsan mek bawk” tiin Singh chua a sawi bawk.
Senior officials te chuan hmun derthawng zuala ngaiha camping na hmun te an tlawh thu sawiin State leh Central forces te chuan State chhunga hmun hrang hrangah combing operation an nei reng a ti bawk.
Internet tihtawpah SC inrawlh tum rih lo
Supreme Court Vacation Bench chuan Manipur ah sorkar in tharum thawhna a tlahniam zel ti reng chunga internet a titawp zui zel khinna rang taka ngaihtuah tura ngenna chu a hnawl rih.
Vacation Bench chuan summer holiday zawh hnuah Regular Bench in a ngaihtuah ang a ti a, he mi chungchang hi State High Court in a ngaihtuah mek a ni a ti bawk a.
Ngenna siam chuan internet shutdown chuan harsatna nasa tak siamin economic, humanitarian, social leh psychological lamah nghawng natak a nei mek tawh an ti a. Naupang te pawhin school kal thei lovin, mipui ten bank atangin sum an la chhuak thei lo tiin an sawi thung.