Manipur hmeichhiate tan Rs. vbc 350 ruahman dawn

Manipur hmeichhiate tan Rs. vbc 350 ruahman dawn
Manipur sorkar chuan hmeichhe nuai 3.5 vel chhawmdawlna atan Rs. vaibelchhe 350 a siam dawn tih Chief Minister Y Khemchand Singh chuan Pathianni khan a sawi.
Social Welfare Department-in Imphal-a International Women’s Day puala hun hman an huaihawtah Khemchand Singh chuan sorkar laipuiin sum a pekte chu state budget lo awm turah telh a nih tur thu a sawi.
He hmalakna hian Manipur-a hmeichhe nuai 3.5 vel awmte tuam a tum thu a sawi a, a bik takin state chhunga chi leh chi inkara buaina chhuah laia harsatna tawkte tanpui tumna a nih thu a sawi.
Manipur-a hmeichhiate chuan tharum thawhna a chhuah hnuah harsatna nasa tak an tuar a, chhungkaw tam takin sum lama harsatna nasa tak an tawk tawh niin chief minister chuan a sawi bawk.
Inkhawmah hian Chief Secretary Puneet Kumar Goel-a chuan state chhunga khawtlang, politic leh eibai dinhmun chawikanna kawngah hmeichhiate hian chanvo pawimawh tak an chang tih a sawi a. Inkhawma chawimawina an hlan hmeichhiate pawh Manipur puma mi tam tak zinga a tlem chauh an ni tih a sawi a, an huaisenna, finna leh chhelnain hun harsa tak karah khawtlang a kaihruai tih a sawi.
Goel-a chuan sorkarin tum bul nei, programme bitum nei dan hmanga inkaihhruaia nen hmeichhia leh mipa intluktlanna tihhmasawn leh hmeichhiate tihchaka tihhmasawn a tum thu a sawi.
Hmeichhia hmasawnna atanga hmeichhiate kaihhruai hmasawnna lam pan a nih mek thu sawiin, hmeichhiate tan chanvo intluktlanna a awm theih nan sorkar institution, khawtlang pawl leh mipuite thawhhona tha tak neih a tul thu a sawi bawk.
Women & Child Development Ministry nena thawhhonaa hmalakna eng emaw zat a sawi a, chung zingah chuan Mission Shakti framework hnuaia hmeichhe harsatna tawkte tanpuina service te, women helpline leh Beti Bachao Beti Padhao campaign hnuaia sex ratio tihsan tumna hmalakna te a tel tih a sawi.
International Women’s Day puala hun hmanah hian Olympian ritchawi chak Ngangom Kunjarani Devi leh hnam hla satu lar Mangka Mayanglambam te chu chawimawina hlan a ni.
Inkhawmah hian social welfare department hotute bakah hmeichhe pawl aiawh leh mipuite an tel.