ina avanga sahimna zawnga Mizorama tlanchhia (internally displaced people – IDP) tanpuina sum hman dan tur sawiin Executive Committee on IDPs of Manipur in Mizoram chu an chairman, Home secretary H Lalengmawia hoin an thukhawm.
Home secretary chuan Manipur tualchhung buaina avanga rawn tlanchhiate chu Mizoram sawrkar leh mipuiin an ensan thei loa, anmahni tuamhlawm a, a tul anga chhawmdawl turin sawrkar leh pawl hrang hrang, mimal pawhin theihtawp an chhuah tih a sawi. Heng IDP-te enkawl nan hian sum harsatna karah Mizoram Finance department chuan vaibelchhe 5 a pek tawh bakah sawrkar hnathawkte atangin vehbur khawn a ni a, Rs. 81,37,271 hmuh a ni, tiin, heng sum hman dan tur hi sawiho a ni.
Manipur IDP-te enkawl nana Food Civil supplies & Consumer Affairs department leh district hrang hrang bawrhsap-ten sum an sen tawh zat, tuna report theih chin belhkhawm chu Rs. 1,10,40,737 a ni a. Sum hmanna tlangpui chu relief camp buatsaih nan, ei leh in tur bakah dawmdawia inenkawlna senso a ni.
YMA leh pawl hrang hrang, Zoram mipuiin Manipur atanga rawn tlanchhiate an lo dawnsawn leh enkawl dan chu Executive Committee chuan chhuanawm a tiin lawmthu a sawi a. Mizoram sawrkarin sum harsatna karah cheng vaibelchhe 5 a tum bakah sawrkar hnathawk ten phal taka sum an thawhkhawm chu lawmawm tiin, lawmthu a sawi. Sum tlingkhawm hi renchem leh tangkai taka IDP-te enkawl nana hmang turin Executive Committee chairman chuan bawrhsap-te leh department-te chu a chah a ni.
Executive Committee on IDPs thurel
# District hrang hrang bbawrhsap-te chu buhfai leina atana an sum hman tiam loin, thildanga IDPs enkawlna atana an sum hman tawhte chu pek tlak thuai nise, an ti a. Buhfai leina erawh FCS&CA hnenah a vaia pek tura tih a ni.
# Hei baka sum sen belhna awm apiang chu rang taka Home department-ah thehlut thin turin bawrhsap-te hriattir an ni.
# Falkland Relief Camp-a awmte tui harsatna phuhruk nan plastic tuizem litre 3000 dawng pahnih lei remtih a ni.
# Kolasib district Bilkhawthlira IDP chhungkaw 50 vel awmna, thlatin man chawia mimal kudam luah hawh mek thlakna tur hmun remchang dang ngaihtuah turin Kolasib bawrhsap chu tih a ni a, a tul dan angin BSUP building Aizawla lak chhoh tura rel a ni.
Manipur IDP-te enkawl nan sawrkarin nuai 110 seng tawh
