Manipur sorkara tel Kuki-Zo MLA-ten an hnamin ensan

Manipur sorkara tel Kuki-Zo MLA-ten an hnamin ensan
Manipur-a President’s Rule hlipa Yumnam Khemchand Singh-a kaihhruai BJP sorkar lak luh a nih tuk chiahah tribal pawl lian ber, Kuki-Zo Council (KZC) chuan sorkar siamnaa tel an hnampui MLA-te chu an ensan (social boycott) tih an puang.
Kuki-Zo hian MLA 10 neiin an zinga pathum – Nemcha Kipgen, LM Khaute leh Ngursanglur Sanate te chu sorkar thar lak luh a nih theih nana hmalatu zingah an tel.
Manipur-a MLA 60 awm zinga 10 Kuki-Zo zingah Kipgen, Khaute leh Sanate te hi BJP an nei a, mi dang pathum chu Kuki-Zo pawl aiawhte an ni.
Kipgen-i hi Kangpokpi bial atanga thlan tlin niin New Delhi-a Manipur Bhavan-a a awm hmunah Nilaini zana sorkar thar lak luhah khan deputy chief minister atana lak luh niin tunah hian council of ministers-a hmeichhe awm chhun a ni.
Churachandpur bial atanga thlan tlin, Khaute hi Chief Minister Khemchand Singh-a hova BJP hruaituten Governor Ajay Kumar Bhalla-a Raj Bhavan-ah hmua sorkar an siam theih thu thlentu zingah a tel.
Tipaimukh bialtu, Sanate hi May, 2023-a an state-a chi leh chi inkara buaina a chhuah hnua a vawi khat nan Nilaini tuk khan Imphal-ah a thlawk lut a, ani pawh hi sorkar thar siam tur avanga lut a ni.
Chief minister hmasa, N. Biren Singh-a kaihhruai sorkarah pawh cabinet minister lo ni tawh, Kipgen-i hian Ningani khan BJP central hruaituten deputy chief minister atana an ti chu lawmawm a tih thu a sawi a. “Nizan khan Manipur deputy chief minister atan lak luh ka ni a, central BJP hruaituten min ringtawk hi ka lawm a. Mipuite tan inpein an inpumkhat nen leh an thatna turin ka bei zel ang,” a ti.
Ningani khan KZC chuan thuchhuah siamin sorkar siamnaa Kuki-Zo MLA telte chu ‘na takin an dem’ tih an sawi a, January 13-a thutlukna an lo siam tawh an bawhchhe chiang hle tih an sawi.
KZC-in an tar lan dan chuan thutlukna kha Suspension of Operation (SoO) pawl, Kuki-Zo MLA leh an pawlin an siam niin sorkar laipui leh state sorkarin ziaka an puala legislature nei union territory siamna tura thu an dah lo a nih chuan sorkar siamnaa tel lo turin an inti niin an sawi.
Tribal pawl lian ber hian tuna ‘Metei-te thunun sorkara’ an tel leh si MLA-te chu a huhova politic-a an dinna leh Kuki-Zo rilru phatsanna a nih thu ans awi bawk.
Social boycott puangin KZC hian an hnampuite chu heng MLA-te hi khawtlang, hnam thil leh thil dang zawng zawngah kawpa thawhpui lo turin an ti.
Kuki-Zo pawl hrang hrangte pawhin Manipur leh Delhi-ah sorkar siamnaa tel an hnampui MLA-te an demna leh an duh lohna an tilang hlawm tih an sawi.
Khemchand Singh-a hi Nilaini zan khan Manipur chief minister 13-na atan lakluh niin a hma ni chiahin BJP chuan legislature party leader atan an thlan thu an puang a. Lok Bhavan-ah Governor Bhalla-a’n rinawmna thu a tiamtir a, deputy chief ministers pahnih leh minister dang pahnih nen a la lut a.
Kipgen-i bakah hian New Delhi atangin Naga People’s Front (NPF) hruaitu, Loishi Dikho chu deputy chief minister atan lak luh niin Govindas Konthoujam (BJP) leh Khuraijam Loken Singh National People’s Party (NPP) chu minister atan atan lak luh an ni.
Khemchand Singh-a kaihhruai council of ministers hi la tihlen tur niin minister pasarih an la awm belh thei a ni.