Manipur sorkarin thu dik lo tidarh lo turin mipui ngen

Manipur sorkarin thu dik lo tidarh lo turin mipui ngen
Manipur sorkar chuan Thawhlehni khan thuchhuah siamin tul lova mi tichiai thei leh muanna tichhe thei thu chiang lo leh finfiah loh thehdarh lo turin mipuite a ngen a. Tharum thawhna thlen thei zawnga che apiang chu dan hmanga na taka an chunga chet ve zel a ni dawn tih an sawi bawk.
Chief Secretary Prashant Kumar Singh chuan mipuite ngenna a siamah khua leh tuite chu zaidawh taka awm tur leh tul lova mi tichiaia muanna tichhe thei thu chiang lo thehdarh lo turin a ti.
Tun hnaiah thu chiang lo tak tak thehdarh thin niin hei hian mi a tibuai a, buaina a awm phah tih Singh chuan a sawi a. Sorkar chuan hetianga mi tibuai thei tidarh thintu mi mal leh pawl pawh a thlithlai reng tih a sawi bawk.
Chief secretary chuan hetiang dan lo ang taka chet tumna thlen theite chu dova thehdarh lo turin mipuite chu tih tak zetin a ngen tih a sawi.
“Mipuiin thu dik an hriat duh chuan sorkarin Control Room a siam a, khua leh tuiten khawi atang pawhin an thu hriatte an finfiah theihna tur a ni a, nileng zankhuaa biak theih a ni a. Muanna a awm theih nan leh dan leh thupek kenkawh that a nih theihna hi kan vaia kan mawhphurhna a ni a, sorkar chuan mi chengte chu hetiang tul lova buaina siam zawnga khawsa lo turin a ngen a ni,” a ti.
Singh-a chuan tharum thawhna tichhuak thei leh mi huat zawng anga khawsate chu dan ang takin an chungin hma lak a nih ve tur thu a sawi bawk.
“Khawtlang hruaitu, mipui pawl hruaitu, sakhaw hruaitu, zirlai pawl, mi fing leh khua leh tui zawng zawngte hi inpumkhata eng hnam pawh an inrintawn leh theihna tur siam turin tangrual ila. Muanna hi kan ngaih pawimawh berah dah ila, inhriat thiam tawnna leh hmasawnnain he state hi tha zawkah a siam dawn a ni,” a ti.
Eng thilah pawh khua leh tuite chu Control Room emaw, an hnaih ber thuneitute emaw be hmasa zel turin chief secretary chuan mipuite a ngen bawk.
Tar lan tawh thin angin Manipur-ah hian May, 2023 atang khan hnam hnih inkarah buaina chhuakin tharum thawhna a thleng nasa hle a. Mi 100 chuang thi tawhin mi za telin an chenna in leh lo an chhuahsan phah tawh a. Tun thlengin intibuaite inkarah inremna a la awm lo.
Pathianni tlai khan Chief Minister N Biren Singh-a a bâng bawk a, a aiawhtu tur tihfel a la ni lo.