Manipur-a venhim hna thawktuten tun hnai ni tam vak lo chhungin tlangram district hrang hrang – Churachandpur, Kangpokpi, Pherzawl, Tengnoupal leh Chandel-a beihpui an thlaknaah silai 155 leh a mu 1,652 an man tih police-in an sawi.
Thu an dawn bawhzuia police, Central Armed Police Forces, Assam Rifles leh sipaiten beihpui an thlakhonaah hian AK series rifle pariat, INSAS rifle pahnih, carbine pali, SLR pakhat, 9mm pistol pariat, 12 bore gun 12, single bore gun 21, tualchher pistol 14 leh rifle dang eng emaw zat an hai chhuak tih police chuan an sawi.
Police hian pompi (tualchher mortar) 31, improvised explosive device (IED) 39, hand grenade 13 leh silai mi 1,600 chuang an man bawk tih an sawi.
Venhim hna thawktute hian inbiakpawhna hmanrua set kim 15 leh binocular pali an man bawk.
“Hengte hi thu kan dawn bawhzuia tlangram district-a Manipur Police, Assam Rifles, sipai leh venhim hna thawktu pawl dangte nen muanna, sorkar thupek leh nunna leh khua leh tuite thil a him nana hmalaknaa hai chhuah leh man chhuah a ni,” tiin police chuan an sawi.
Manipur-ah hian muanna leh himna a awm theih nan police chuan mipuite chu police leh venhim hna thawktute thawhpuia thil rinhlelhawm an hriat leh hmuh chuan an hnaih ber police station emaw, central control room emaw hrilh thuai zel turin an ngen.
Tar lan tawh thin angin hmarchhak state-ah hian May, 2023 atang khan chi leh chi inkara buaina chhuakin inepna boruak a nasa hle a, mi 260 chuang thi an awm tawh.
Kumin February-a Chief Minister N Biren Singh-a a bân hnuah sorkar laipui chuan President’s Rule-ah dahin hei hi tuna parliament session neih mekah thla ruk dang pawh sei a ni nghe nghe.
Manipur tlangramah silai leh a mu thahnem tak man
