Inrinni zan Serie A inkhel pakhatah Serie A hmahruaitu Napoli chuan Diego Armando Maradona stadium-a an mikhual Juventus lakah 2-1 hnehna changin, an kawtkaia an point thum hnuhchhuah leh avang hian an hnuai chiaha pahnihna luahtu Inter Milan lakah point rukin an sang ta a, mahse, he thu buatsaih lai hian game hnih laiin Simone Inzaghi team lakah an khel tam zawk a, Inter hian match hnih hi khel zoin chak ve ve se Naples khaw team hi lehpelh theihna dan an nei.
Head coach thar Thiago Motta hnuaia an league game hmasa vawi 21-a tlawm pumpelh fai vek thei Juventus hian Napoli mualah goal thun hmasain, chawlhlawk dawna debutant Randal Kolo Muani goal khat tihluh hmangin half time-ah Turin khua atanga thawkchhuakte’n sikhat faiin hma an hruai phawt.
League hmahruaitu Napoli erlet tan second half tir lamah Frank Anguissa chuan an siphurh a sut a, a club vawn lai tan game 140 a khelh hnua a goal 10 tihluhna chiah a ni.
Minute 70 khelh tlin dawnah Juventus defender Manuel Locatelli chuan penalty box chhungah Manchester United midfielder hlui Scott McTominay titluin mikhual lamin penalty an chawi a, nikuma Chelsea atanga an sengluh Romelu Lukaku chuan Michele di Gregorio ven goal-a chhuihlutin Napoli chakna goal ni zui ta a thun a, Serie A season kal laia a vawikhatna’n Juve an tlawm ve ta nge nge.
Kum 2023-a Juventus zawm a tumna tlawlh tak hnua Naples khaw lam pan ta zawk Belgian striker Lukaku hian season kal laiah Napoli tan goal kua a thun tling chiah a ni.
Juventus an tlahniam zel a, table-ah pangana ni leh duai tawhin, hmahruaitu Napoli nena an inthlauhna pawh point 16 ngawt a tling tawh a, Champions League khelh phakna chin hniam bera awm Lazio lakah point hnihin an hniam.
Maradona muala tlawm Juve chak loh vawikhatna
