Ningani khan Lamka-a Peace Ground-ah Zo hnahthlakten martar-te thlahna hun an hmang a, mahse an ruang an phum ta lo.Manipur-a Zo hnahthlakte leh Meitei inbeihnaah mi engemaw zatin nunna an chan tawh a, Zo hnahthlakte intelkhawmna Indigenous Tribal Leaders Forum (ITLF) te chuan Zo hnahthlak mi 130 velin nunna an chan tawh tiin an chhinchhiah. Chung zinga hriat chian, post mortem tih tawh, dan hmanga tihfel ngai tihfel tawh mi 35-te thlahna hun hman leh vuiliam an tum a, mahse thuneitute ngenna avangin an tum angin an ti ta lo.
An tum lawk angin mi 35-te ruang thlahna hun an hmang a, an chhungte pawh an kalkhawm. Mahse thlana vuiliam an ni rih lo.
ITLF hotuten The Aizawl Post an hrilh danin, sorkar laipui tirhin Assam Rifles hotuten ruang hi phum rih lo turin an ngen a ni.
ITLF hian Lamka-a sorkar ram, sericulture department ramah martar-te ruang hi phum an tum a, hei hi Meitei lamin an duh lo hle. ITLF hruaitute chuan Assam Rifles hotute hian sericulture ramah ruangte hi phum a nih chuan thil duhawm lo a thleng thei a, chuvang chuan phum rih lo turin an ngen tih an sawi.
Sorkar laipui thu hmuin Assam Rifles hotute hian ram hi ni nga chhungin ITLF te kuta dah a nih theih nan hma an la ang tih an tiam a, Manipur-a buaina thleng mek chungchangah inbiakna (political talk) a awm ang tiin an tiam bawk, ITLF hruaitute chuan an ti.
Zo hnahthlak nunna chante ruang hi Lamka-a District Hospital bakah Imphal-a damdawi in hrang hrangah a la awm a, chungte lakkhawm chu Assam Rifles lam hian an tiam tih an sawi bawk.
Ningani-a Peace Ground-a hun hmanah mipui an thahnem a, martarte ruang phum lo mah se mipuiin mi 35-te thlahna hun an hmang a ni.
Hemi ni hian Churachandpur District-ah Zo hnahthlak nuho leh venhim hnathawkte an innawr a, thil duhawm lo a thleng zui lo tih thu dawn a ni.
Martar-te thlah, mahse phum lo
