Nimin chhun khan Maruti Suzuki dealership GIG chuan Edenthar-a an Arena showroom-ah rampum huap pawha car hralh kal, Maruti Suzuki Swift chu a generation thar an tlangzarh a, hetihrual hian kum dangah pawh an lo tih thin tawh angin HSCL Top 10 a lang, mi 13 te nena scholarship Rs 12,000 theuh an hlan nghal bawk.
Swift thar hi Mizo footballer hriathlawh Lalengmawia Ralte (Apuia, Mumbai City FC)-in a khuhhawnna neiin, Apuia chuan car a la neih loh thu sawiin, car chinchang hriat a nei meuh lo ni a sawiin, Swift thar chu, “A that hmel khawp mai,” tih bak sawi vak ngaihna a hre lo niin a sawi a, chutih rualin zirlai, HSLC top 10 te chu fuih nghalin, U-17 World Cup a khelh tumin eng emaw tak ni a inngaihna te neih ve mai a awl a, mahse, U-17 World Cup khel zawng zawng an hlawhtling zui vek kher lo a, chutiangin HSLC Top 10 a pass te pawh bul an tan dawn chauh a ni a, top 10-a pass hlawhtling zui lo a awm theih a, chuvangin taima taka bei chhunzawm zel turin a chah nghal bawk a ni.
GIG CEO John Lalpeka chuan zirlaite tana scholarsip chu an hnuaia tawktu zawng zawng, a tê atanga a lian ber thlenga an thawh khawm niin a sawi a, “Scholarship atan hian tawktu zawng zawngin thla tin kan lawmman atangin kan thawh khawm a, chumi tlingkhawm chu a ni a, chuvangin zirlaite pawhin min ngaihhlut sak ve ngei kan ring a ni,” a ti.
Swift thar hian danglamna a nei nual a, a model hmasate aiin 15mm in a sei zawk a, 3860 mm a sei nin, a zau zawng leh wheelbase erawh a la pangngai a, 1735 mma zau niin, 2450mm wheelbase a nei bawk. A hmel landan pawh tihdanglam a awm nual a, a hmaamah grille dum tliang tha hlarh mai neiin, a headlamp thar pawhin LED projector light, LED daytime running lamps, LED foglamp leh LED taillight te a nei thar a, a model sang deuh chuan 15-inch dual-tone alloy wheels a nei bawk.
Swift thar hian body colour chi hnih a nei thar a- Luster Bkue leh Noval Orange an rawn ti thar a, a rawng kan lo hriatlar tawh Sizzling Red, Pearl Artic White, Magma Grey leh Splendid Silver te pawh a la awm tho. Dual-tone colour option pathum- Lustre Blue leh Midnight Black Roof, Sizzling Red leh Midnight Black Roof leh Pearl Artic White leh Midnight Black Rood te a awm bawk. Customasition accessory package pawh pahnih an tih belh a- Racing Roadstar leh Thrill Chaser te a awm thar bawk.
A cabin an tidanglam nual a, wraparound look neiin, all-black theme a ni a, a dashboard an design thar a, driver oriented a ni ta deuh a, 9-inch Smartplay Pro+ infotainment system neiin, wireless Apple CarPlay leh Android Auto a support a, ARKAMYS surround sound system neiin, Suzuki Connect a thuam a ni a, fast charging A & C Type USB port a hnunga chuangte tan neiin, rear AC vent, cruise control, 60:40 rear split seat leh keyless entry te a nei ta bawk.
A chuangte himna atan an thuam tha lehzual a, airbag paruk, Electronic Stability Program (ESP), Hil Hold Assist, Anti-lock Braking System (ABS) leh Electronic Brakeforce Distribution (EBD) bakah Brake Assist, 3-point seat belt (a seat zawng zawng tan, reminder nen) a nei a, reverse camera pawh a view a zau lehzual ta bawk.
A mechanical hi a danglamna langsar tak niin, 1.2-litre Z-Series, 1197 cc, three-cylinder petrol engine neiin, 80.4 bhp @5700 rpm leh 111.7 Nm torque pechhuak thei a ni a, 5-speed manual gearbox leh 5-speed automated manual transmission (Maruti-ho chuan auto gear shift (AGS) an ti ve thung) a awm a, a manual version hi a fuel efficiency chu 24.80 kmpl niin, AGS hi 25.75 kmpl a ni ve thung.
Maruti Suzuki Swift thar tlangzarh rualin GIG HSLC Top 10 Scolarship sem
![](https://theaizawlpost.org/wp-content/uploads/Clipboard01-1137.jpg)