March ni 30-a Chelsea khelmuala draw result an hlawhchhuah tuma red card hmu Burnley manager Vincent Kompany chu match hnih chhung khelmual sir atanga a team enkawl thei lo tura hremna pek a ni.
Two-match touchline ban-ah hian match khat chu a tuar tlngtla nghal dawn a, Inrinni Premier League inkhel pakhata Clarets-in Turf Moor khelmuala Brighton an mikhual hunah hian mipui zig atangin inkhel a en a ngai dawn a, match khat dang a la hmabak erawh kumin chhung atan an la kheksak ang a, hetih chhung hian a nungchang an en ang a, a khawsak danin a zir lo chhunzawm a nih chauhin he hremna pakhat zawk hi a tuar dawn a, nungchang mawi lo a lantir chhunzawm lo a nih chuan ‘one-game ban’ la awm hi a tawrh kher a ngai dawn lo.
Manchester City captain hlui Kompany hi Lorenz Assignon ‘red card’ hringchhuaktu penalty a sawisel dan avangin referee Darren England chuan touchline atangin a hnawtbo a, a hnuah Belgian hian tun season Premier League-a referee-te ham dan (referee standard) chu tha tawk lo leh felfai lo tiin a sawi zui a, hei hian match hnih hremna a hringchhuak zui ta a ni.
Kum 38 mi hian a tawngkam hman mawi lo avanga nungchang mawi lo lantira an puhna a pawm a, thupha pawh a chawi tawh a, match hnih hremna bakah hian £10,000 chawi tura tih a ni bawk.
Stamford Bridge inkhelah khan penalty area chhunga a foul avangin Mykhailo Mudryk chu half time hma lawkin a vawihnihna atan yellow card pek a ni a, hnawhchhuah zui nghal a ni.
Burnley hi Premier League table-ah 19-na ni mekin, himna hmun hi point rukin an thleng pha lo mek.
An boss Kompany hnuaiah tun season-a league game vawi 32 an khelh tawh atangin Burnley player pasarih hnawhchhuah an ni tawh a, top flight team zinga red card hmu hnem ber an ni mek.
Match hnih atan Kompany an hrem
