Mau hmanga thil siamtute mamawh hlan
Sawrkar laipui scheme atanga mau leh thing hmanga thil siamtute hnenah an mamawh tur bungrua cheng nuai 200 chuang man hlan a ni.
National Bamboo Mission leh Micro, Small Enterprises – Cluster Development Programme (MSE-CDP) Scheme atanga Bamboo Development Agency kaltlanga hmuh khawl chi hrang hrang 80 chu Edenthar Bamboo Handicraft Cluster, Sesawng Bamboo Handicraft Cluster, Tuma Ecoguard Solution leh Wood Carpentry Cluster Baktawng hnena hlan niin, bungraw sem chhuah hlut zawng hi Rs. 2,67,44,174 a ni.
Commerce & Industries minister F Rodingliana chuan Bamboo Development Agency (BDA) hmalaknaa khawl chi hrang hrang sem a ni chu lawmawm a tih thu a sawi a. Kan rama leilung hausakna kan neih mau/ rua leh hruihnang tangkai taka hman a tul, tiin, Mizoram-in hma a sawn zelna atan, thalaite chawikanna atan leh hna tam zawk siam theihna atan industry/ cluster din a pawimawh tih hria in, BDA chuan cluster dinin, mimal industry din pawh a theih ang angin a pui mek tih a sawi. A bikin paper mill din leh bamboo pulp hman tangkai kawngah ngaihtuahna seng tam turin cluster hrang hranga beneficiary-te a chah.
BDA hi kum 2002-a din a ni a, Mizorama mau hman tangkai leh sawngbawl kawngah hma a la thin. Tunhnaia handicraft cluster leh entrepreneur-te thlunzawm tumin, entrepreneur leh industry dintute tan workshed leh hmunhma a hman hawhtir bakah Bamboo Technology Park Sairang-ah agarbatti stick leh a agarbatti stick siamna bungraw ningnawi hmangin briquette charcoal siam leh thawnchhuah kawngah hma a la ni. Central Jail a tangte tan vocational training pe bawkin, raw batti/ thosi hlo siam a zirtir a, an thil siam hi tualchhungah hralh chhuah thin a ni.
Hmasawnna tura kalpui mek zingah Bamboo Technological Park Sairang tih changtlun, National Bamboo Mission (NBM) atangin EIBTC building Zuangtuia Incubation Centre siam, MSE-CDP hnuaiah EPIP Lengte-a sawmill waste atanga fuel pellet siamna project buatsaih leh, mau atanga fibre lak chhuah dan zirchiangin, hemi atan hian DPR siam mek a ni.
Mau hmanga thil siamtute mamawh hlan
