Mau chinna khua Hmunpui rama link road sial nan cheng nuai 105 sen a ni a. Mau chi buaipuina atan sawrkarin cheng nuai 648 a seng tih Horticulture minister Prof Lalnilawma chuan a sawi.Assembly Session-a BJP member Dr K Beichhua zawhna chhangin minister chuan, Horticulture department hnuaiah mau chinna khua, Hmunpui ram chhung, Saiphai zau leh Hmunpui khaw bulah Bamboo Link Road laih niin, Link Road laih nan Rs. 1,05,00,000 hmanral a ni tih a sawi.
Zawhna dang chhangin Prof Lalnilawma chuan, National Bamboo Mission hnuaia mau chi supply zat record an nei chiah loa, a chi erawh 910725 phun niin, a hmunin a zir loh vang nge, khaw lum vang nge, a phunna pui ber Hmunpuiah chuan zaa 70 vel dam khawchhuaka ngaih a ni tih a sawi a. Mau chi buaipui nan Rs. 6,48,16,750 senral niin a sawi a, Bamboo Link Road-ah chuan an department-in an chhan theih a chhang a, department dangin an ti ve a nih chuan an hriatpui lo tih a sawi.
Horticulture minister chuan, kan rama mau hman tangkaina em em kan neih hriat a ni rih lo tih sawiin, “Kan mau neih mekte hi hman tangkai dan kan zir chho mek. Tunhnaiah Taiwan-ah officer thenkhatte nen kan zin a. Project siamin hmalak tum mek a ni,” a ti. Mau chi thar ni lo, kan mau neih mekte hman tanglai tum a ni tih a sawi a ni.
Kan mau neihte ethanol siamna atana rawn hmang duh an awm tih sawiin, “UK base company-te pawh kan mau atanga ethanol siamchhuak turin investment rawn tih an duh a, thutlukna siam a la ni lo. Bamboo charcoal atanga fiber siam chu rilru ah a awm a. Engtiang chiahin nge kan mau hman tangkai kawngah kan kal dawn tihah chuan sawrkarin thutlukna a la siam ang,” a ti.
Mau Link Road laihnan nuai 105 Mau chi buaipuinan nuai 648 seng
