Horticulture department chuan kum 2020 atang khan loneitute hnenah mau tiak chin tur 8,49,425 a sem tawh a, mau tiak leina atan Rs. 6,48,16,750 a hmang tawh.
RTI hmanga zawhna Horticulture directorate SPIO-in a chhan danin, loneitute hnenah mau chi (species) pathum -Dendrocalamus brandisii, Dendrocalamus sikki-mensis leh Dendrocala-mus longispathus chintir an ni a. Mau tiak hi kum 2020 atangin loneitute chin tura pek chhuah tan niin, kum 2020-ah tiak 84000, 2021-ah tiak 250425 leh 2022-ah tiak 515000 sem a ni a, mau tiak lei tawh sem chhuah loh a awm lo.
Mau chi hi state chhunga nursery-te atanga lei niin, mau tiak leina hi – Mizoram Bamboo Producer (MBP), Bairabi Bamboo Nursery (BBN), Rokunga Kawlremi & Sons (RKS) leh Inter-State Marketing Cooperational Services (IMCS) atangin lei a ni. Mau tiak hi a chi (species) azirin a leina man a inang loa, Brandisii hi tiak khat Rs.80 zela lei niin, tiak 344875 lei nan Rs. 2,75,90,000 sen a ni.
Sikkimensis hi Rs.70 in tiak 1,22,900 lei a ni a, chumi atan chuan Rs. 86,03,000 sen a ni. Sikkimensis vek hi pakhat Rs. 75-in tiak 2,85,400 lei a ni bawk a, Rs. 2,14,05,000 sen a ni. Longispathus hi pakhat Rs. 75-in tiak 96,250 lei nan Rs. 72,18,750 sen a ni.
Mau tiak leina firm/ supplier/ nursery zingah MBP hnen atanga lei tam a ber a, kum thum chhungin mau tiak 4,38,275 lei a ni. BBN hnen atangin tiak 1,68,200; ICMS atangin tiak 164200 leh RKS atangin tiak 78750 lei a ni.
Mau chintirte hi a tiak pek an nih bakah sum pek tel an ni a; sum pek chhuah dan hi scheme azirin a inanglo a, an chinna ram zau zawng mila pek a ni. Model Bamboo Plantation under SEDP-NBM convergence 2019- 2020 ah hectare khat zel atan Rs. 1,13,761 anga pek a ni a, a kum lehah SEDP hnuai atanga a enkawl zuina turin (2nd Year maintenance Model Bamboo Plantation under SEDP 2020- 2021) ah hectare khatah Rs. 35000 anga pek an ni.
SEDP 2020- 2021 ah bamboo plantation bul tanna turin hectare khatah Rs. 1,30,000 anga pek an ni a. NEC 2020- 2021 hnuaiah (Bamboo Development Project in Mizoram under NEC 2020-21) ah hectare khatah Rs. 87500 anga pek tel niin, a kum lehah a enkawl zuina atan hectare khatah Rs. 3500 anga pek a ni.
Mau chinna atana Horticulture department-in sum a hman tawh zawng zawng chu cheng nuai 1752 a ni a, NMB hnuaiah kum 2018- 2020 inkarah cheng nuai 174.60 hman niin, NEC hnuaiah 2020-2021 ah nuai 1114 leh SEDP hnuaiah 2019-2022 chhungin cheng nuai 463.40 hman a ni tawh.
Mau tiak hi Mamit district-ah chintir tam ber a ni a. Mamit district bik atan tiak 3,30,125 pek chhuah niin, Serchhip district-a chintir a tlem ber a, tiak 1000 chin a ni. Serchhip district bika chintir hi Sikkimensis niin, Bungtlangah mi pathum, E.Lungdar leh Biate ah mi pakhat ve vee hnenah mau tiak 200 theuh chintir an ni.
Mau hi chintir mek a nih avangin production a la awm lo tih sawi a ni a. Kum 4-5 hnuah production a awm theih beisei a nih thu RTI chhannaah hian tarlan a ni. Tharchhuah a la awm hma chu mau hralhna turin department-in ruahmanna a la siam rih lo tih sawi a ni.