Maumuala ram awl mimal
hnenah kan pe ve dawn lo
– Chief minister
Maumualah a tira remna avanga MNF rawn kirte hnena ram pek chin ho (phase I) bik re-survey zawh a nih hunah ram awl a awm a nih pawhin mimal hnenah pek a duh ve lo tih chief minister Lalduhoma chuan a sawi.
Aizawl Maumuala LSC nei intelkhawm – Maumual Land Owners’ Association chuan Ningani khan chief minister an hmu a. Harsatna an tawh, Maumual panna kawng leh PHE tui connection dilna an thlen. An harsatna hi chinfel pui a lo tiam a, hma a lakpui nghal.
Aizawl Maumualah in sak phal a nih veleh ram neite chu kawng hnaih lutuka in sa lo turin chief minister hian a chah a. Veng nuam tak din tum tura chahin, vantlang ram tur pawh khawtlang tana tangkaia hman a nih theihnan lo humhalh tlat turin a sawm.
Maumualah hian a tira MNF returnee ram pek chin ho (phase I) bik re-survey zawh a nih hunah ram awl a lo awm a nih pawhin mimal hnenah pek a duh ve lo tih a sawi bawk.
Maumual ram hi kum 1987 chhoah remna avanga MNF rawn kirte tana sawrkarin a pek a ni a, kut thlak theih rih loha resurvey a ni a, approved mai hmabak nia an hriat thu thlenin, a ranglama in sak phalna pe tur leh resurvey pawh approved tawh turin Land Owners’ Association hian chief minister hi an ngen a. A rang thei ang bera hma laksak a tiam.
Thudawn danin, Maumuala MNF returnee tana pek ram hi returnee ni lo mi tam takin an lei chhawng tawh a, retunee ram la neite pawh an la awm nual nia sawi a ni.
Maumual Land Owners’ Association hian CM Relief Fund atan member-ten an thawhkhawm Rs. 23400 an chhunglut nghal a ni.
Maumuala ram awl mimal hnenah kan pe ve dawn lo – Chief minister
