Chawlhkar kaltaa Mizoram sawrkar sum enkawlnaa kalphung thar “digital financial management pali” a tlangzarhnaah chief minister Lalduhoma chuan, tunhnaia sum an tih lapse chhan leh SASCI sum an dawn har chhan chu “department thenkhat thiam loh vang” tiin a sawi a.
SASCI sum lapse chhan leh SASCI sum dawn har chhan hi tun thla tir (2nd Oct) khan MNF chuan thuchhuah siamin sawrkar an lo zawt tawh a, tuna chief minister-in a sawi hi MNF zawhna a chhannaah a ngaih theih awm e.
Dr. APJ Abdul Kalam kha kan hre vek ang a, India ram Science leh Technology tih changtlunna kawnga sulsutu pawimawh ber zinga pakhat, ‘Missile Man’ tia hriat hlawh, a hnuah pawh “Mipuite President” (2002-07) tia koh awm chhun ni zui leh thei kha a ni. Kum 1979 khan ISRO hnuaia India Satellite Launch Vehicle (SLV-3) project director a ni. (SLV hi Mizo ten kan hriat thiam theih dan tur chuan, ‘Satellite/Rocket kah chhuah phurtu’ ti ila, a fiah mai awm e.) He project hi a theuneu lo hle a, kum 10 chhung zet an buaipui a ni. A tawpah an siam zo a, Sriharikota atangin an kap chhuak a, mahse second stage-ah a chhe ta hlauh mai a; Bay of Bengal-ah a tla a.
Press conference neih a lo tul ta; project director Abdul Kalam tan chuan a huphurhawm ve ngawt ang! Mahse, ISRO Chairman Prof. Satish Dhawan chuan press mite a hmachhawn ta hlauh a. “Dear friends, we have failed today. I want to support my technologists, my scientists, my staff, so that next year they succeed,” tiin mawhphurhna a inbel a; ‘Project director Abdul Kalam hian a hote nena an hlawhchham chhan hi han sawifiah vel teh se’ a ti lo.
A hnuah Abdul Kalam hian “He took the whole blame on himself despite criticisms. He took all the blame and assured them that next year we would succeed because his team was a very good one,” tiin a sawi a ni.
ISRO Chairman Prof. Satish Dhawan sawi ang ngeiin a kum leh mai July 18, 1980-ah SLV-3 chu hlawhtling takin an kap chhuak ta a, Rohini RS-1 chu orbit-ah an dah thei ta a ni. Press conference chu Dhawan-a hova neih tur a ni a, mahse Dhawan chuan Kalam-a chu Press mite hmachhawn turin a tir ta zawk a.
“I learned a very important lesson that day. When failure occurred, the leader of the organization owned that failure. When success came, he gave it to his team. The best management lesson I have learned did not come to me from reading a book; it came from that experience,” tiin Dr APJ Abdul Kalam chuan a sawi a ni.
Project a hlawhchham chuan leader-in mawh a phur a, Project a hlawhtlin chuan a hote hnenah credit a pe thin – tih hi Prof. Dhawan atanga a zir chhuah a ni a, chu chu amah ngei pawhin a hnuah a entawn thin tih midang kâ atangin hriattur a tam a ni.
He chanchin atang hian, mawhphurhna inpe ngam hruaitu/hotute chuan an hnuaia thawkte phurna leh chakna thar a pe a, chu chuan hlawhtlinna leh hmasawnna tha tak a hring chhuak thin tih kan hmu thei a ni.
Mawhphurhna la ngam Hruaitu
