Khawvela langsar taka a mipatpui kawp thin zinga Muslim puithiam (imam) hmasa ber nia hriat, Muhsin Hendricks-a chu Inrinni khan South Africa chhim lama Gqeberha-ah kah hlum a ni tih police-in an sawi.
Imam hian mosque a enkawl a, a enkawl hmun hi amah ang bawka mawngkawhurte leh mihring nun dan pangngai lova khawsa Muslim-te awm khawmna hmun a ni a. An hmun atanga car-a mi dang nena chuanga an chhuak tur chu lo dangin kah a ni tih police chuan an sawi.
“Tute nge an nih hriat rih loh hmai tuamin an lirthei hi vawi tam tak an kap ta a ni,” tiin Eastern Cape police chuan thuchhuah an siamah an tar lang.
“An tlanchhe zui nghal a, lirthei dang lo khalhtu pakhatin a hnunga chuang chu Hendricks-a a nih thu leh kah hlum a nih thu a sawi a ni,” an ti.
Police thupuangtu pawhin AFP hnenah social media-a video darh angin Port Elizabeth tih thin, Gqeberha bula Bethelsdorp-ah Hendricks-a hi tun reng vanga thah a nih thu a hrilh tawh.
Hendricks-a hi LGBTQ zalenna atana bei nasa tak niin kum 1996 khan mawngkawhur a nih thu hi a inpuang a. A pianna, Cape Town bula Wynberg-ah Al-Ghurbaah mosque a enkawl a ni.
Mosque hi ‘Muslim sakhaw dana duh lohte leh hmeichhiaten Islam an biakna hmun him’ tiin an website-ah chuan an tar lang.
Hendricks-a chanchin hi kum 2022 khan documentary pakhat, ‘The Radical’ tihah tihlan a lo ni tawh a, a hma pawhin a khawsak dan chu sawisel leh beih a lo tawk thin a ni.
South Africa hi khawvela mi thahna thlen tamna ram ber zinga mi niin February, 2024 thleng khan kum khat chhungin mi 28,000 vel thah an ni tih police-in an tar lang.
Mawngkawhur chunga Muslim puithiam ni hmasa ber that
