- Dr Lalmalsawma
May thlaa CM-in a hawn Bamboo
Technology Park khar a ni leh tawh
- Dr Lalmalsawma
Kumin May 14-a chief minister Lalduhoma hawn Sairang-a Bamboo Technology Park chu hna thawk zui loa khar a ni leh tawh tih Congress hruaitu Dr Lalmalsawma chuan a sawi.
MPCC treasurer Dr Lalmalsawma Nghaka hian Nilaini khan Bamboo Technology Park hi tlawhin an kalpui dan a enfiah a. Cheng nuai 252. 826 man he project-ah hian mau atanga meihawl siam an tum bakah mau sawngbawl (seasoned) a kum 50 thleng dahthat theiha siam an tum tih a sawi a ni.
“Sawrkar thuchhuaha a inziah danin, he project hian nitin meihawl ton 3 a siamchhuak thei dawn a, kum khatah ton 9000 vel siamchhuah an tum. Mau pawh nitin pum 670 vel a mamawh anga chhut a ni. Hei hi ZPM research base a ni em ka hre loa, DPR pawh kan nei lo. Mahse sawrkar press release-a a inziah dan a ni. Research base-a kal tura intiamten he plant hi an hawn rualin an kalpui zawm thei lo nghal hi thil mak a ni,” a ti.
Meihawl siamna hmun chu an hawn lai vela hma an lak bak chhunzawm a awm loa, an meihawl siamchhuah hi a hnip em em a, a sawm nghal vek zel avangin Sairanga thingpui dawr ho pawhin hman tlakah an ngai lo tih a sawi a ni.
“Chief minister-in a hawn ni khan a tawiawmtu minister pakhat phei chuan mau sawngbawlna lamah Mizoram-in bung thar a kai dawn ti hialin a sawi a. Bung thar kaia hnekin tunah khar (shut down) a ni der tawh a. Mipui sum nuai za tel tehmeuh luanraltirin a awm hi a vanduaithlak. He project-a sum an hman vaibelche 2.52 hi Sairang to Kawnpui kawng chhe zual siamnan khan lo hmang se, tuna harsatna kan tawh zozai hi kan tawk lo tur,” Dr Lalmalsawma hian a ti.