Mbappe lung a awi hliah hliah
A Paris St-Germain contract tawp hun June ni 30 ral ruala Real Madrid zawm nghal thei turin France forward Kylian Mbappe chuan kum nga daih tur contract a ziak fel tawh a, chu inremna chuan a lung hi a han tiawi khawp a, vawi duai lo mumang lama a lo man thin a taka lo chang ta niin a sawi!
Thawhtannia inremna an ziahah chuan kum 25 val Mbappe hian Madrid sumbawm atangin kum nga taltap chhung chu season tin euro maktaduai 15 (£12.8m) a hlawh zat zat dawn bakah Bernabeu Stadium luahlum tura contract a sign manah bonus euro maktaduai 150 (£128m) a dawng tel dawn a, hei erawh kum nga chhunga pektlak tur niin, a thlalak hralhna man (image rights) atangin ‘percentage’ dawn tur a la nei tel cheu bawk!
Chuti ang taka hamthatnain a vur tur Mbappe chu a han phur tawh khawp a, Instagram-ah post siamin, “Tu mah reng hian tun dinhmun taka ka hlimzia peh phur tawhzia hi an hrethiam miah lo ang.
“A dream come true dik tak a ni e. Ka thinlung duhthusam tak mai ka zawm thei ta hi ka hlimin, ka inchhuang ve veng mai,” a ti.
Europe club inelna sang ber Champions League title la ngunber nia trophy hlu bik European Cup title tum 15 la tling hlimhlawt leh La Liga title lawm kal mek Madrid-in khawvela striker thaberte zinga mi an chhawr dawn a, kumin hian ‘Galacticos era’ thar an hawng chho lek mek hi a ni ber mai a; hmatawng hriam an neihsaho Brazil forwards pahnih Vinicius Junior leh Rodrygo bakah leithar ve bawk Endrick leh lei fuh lutuk England midfielder Jude Bellingham-te nena thlawhhma an han laho tur hi an elpui tawh phawt tur tan chanchin ngaihnawm a ni hauh lo ang le!
Kumin February thla daih tawh khan Mbappe hian tawngka chuan Real zawm hi a lo remti tawh a, May thla khan season kal lai tawp ruala French champion a chhuahsan tur thu puangin, PSG hi he club chanchina goal khung hnem ber (256) ni chungin a chhuahsan dawn ta a ni.
Season liamta ti ila la liam fel chiah lo deuhah khan PSG record goalscorer hian a chhuahsan tur club tan game 48-ah goal 44 a la hnutchhiah leh hram a; tunhnai season ruk liamta chhung khan French top flight-ah top scorer a ni fai vek bawk!
Club level-ah Ligue 1 title pasarih la tling tawhin, a hmasaber chu kum 2017-a a chhuahsan Monaco thuam a inbel laia a sualchhuah niin, a dang paruk chu PSG khawlbawmah a chhunglut a; league title heti zat bakah hian French Cup winners medal pali awrh tawh bawkin, a trophy khuhngkhawmna bawma hmuh tur la awm ve lo awmchhun tih theih hial tur Champions League trophy pawh season tharah hian hmin nghal tura beisei a ni!
He Frenchman hian Qatar rama 2022 World Cup nghah a nih tum khan final penalty petah a team chu Argentina lakah chakpui zo ta lo mah se goal thun hnem ber lawmman Golden Boot a lo dawng tawh bawk.
Kum 2019-20 khan Champions League finalist pawh a lo ni ve tawh a, tarlan tak angin, a club vawn thar hi Europe club competition lian bera champion thang an nih avangin nakkum tun ang hunah chuan Champions League winner a tih theih tawh hmel!
Kylian Mbappe hi PSG-a contract hmangzo mai tawh tur a nih avangin Real Madrid hian free transfer-in an senglut thei hlauh a, signing-on bonus lama an vur nghek tur pawh hi a awm tho mai!
PSG-a a contract a hman zawh dawn tak avangin Ligue 1 champion hian AS Monaco atanga euro maktaduai 180 (USD 195.95 million) tehrenga an leina transfer fee kha a sumfai zawngin an hmulet dawn ta lo tihna a ni!
Real Madrid-a an inremna ziah behchhanin Mbappe hi khawvela footballer man to ber dawttu a ni thei dawn a, a PSG team-mate hlui Neymar mana French club-in kum 2017-a euro maktaduai 222 an pek chiah kha man to lama tlukloh a neih awmchhun a ni dawn.
A hmain Mbappe lakah Real Madrid hi an lo hlawhchham tawh a, PSG-in Spanish club dawrna an hnawl avangin May 2022 khan French star hian PSG-ah a contract neih lai a lo pawhsei phah ringawt tawh a ni.
July ni 1-a La Liga transfer window an hawn rualin Spain a pan tawh dawn a, Euroe 2024 khelh hma ngeiin an France striker leithar hi Bernabeu-ah an phochhuah a rinawm.
2018 World Cup winner Mbappe hian a club tharah veteran player Luka Modric a la khelhpui hman dawn a, Croatian midfielder hian tunhnai khan kum khat atan a contract neih lai a pawtsei a, kum 38 mi lai ni tawh mah se Spanish giants chuan an kianga awm turin an la iai lo.
Karliamta Inrinni Champions League final-ah khan Modric hian Wembley khelmualah substitute luahin khelmual a lut tlai a, a team chu Borussia Dortmund lakah 2-0 hnehna chanpuiin, contract tharin a deng zui ta a ni.
Tottenham midfielder hlui contract neih lai hi tunthla nawi lama zo ve tawh tur niin, thla 12 chhung atan club lamin an pawhsseisak leh ta a ni.
Wembley final minute li chiah awm tawha Modric tana khelmual chhuahsan German Toni Kroos, 34 erawh tuntum Champions League final kha kum 10 chhunga Real tana a khelh tawpna ni tawhin, Euro 2024 zawh rual hian inkhelh bansan ve tawh a tum a, Madrid superstar thar Mbappe nen team khatah an awmho hman dawn ta lo chiah chiah a ni.
Pathianni khan Spanish khawpui ber Madrid-ah Real hian Champions Leagye trophy an hawn thar chu khawlai an fanpui a, fans an kokhawm hnem ngang mai.
Mbappe lung a awi hliah hliah
