Mbappe tel loa chak zo lo Real
Khelh hniha khel tlem zawk chunga Spanish Primera Liga hmahruaitu Barcelona laka point hniha hniam chungin Inrinni zanah Real Madrid chuan Rayo Vallecano an luhkhung a, hliam tenau avanga chawlhhahdamtir Kylian Mbappe tel loin Estadio do Vallecas inkhelah Spanish giants an chak zo lo a, 3-3 draw nen Catalan team lehpelh theihna hun tha an bawhpelh.
Bernabeau club hian point khatin hmahruaitu Barca an pha lo a, nizan inkhel result tarlan hman lohah Nou Camp club hian an mikhual team talbuai Leganes an hneh chuan Real Madrid game khata khel tam zawk chungin an hnuai chiaha awm Real lakah point liin an sang thei dawn.
Mipui 14,168 hmaa inkhelah sihnih faiin Madrid club an hnufual hman a; tan atanga minute lina lekah Vallecano hian an mikhualte barakhaihin, Unai Lopez chuan Jorge de Frutos siamsak atangin home team hmahruaina goal a khung.
Chak mamawh Carlo Ancelotti team hian an siphurh an sut zo lo mai ni loin minute 36-ah goal dang an chhuah belh leh a, sihnih faia Rayo Vallecano hmahruaina goal hi Abdul Mumin-a tauhluh niin, he goal zet hi chuan milian muhil a kaiharh chiang hle a, goal hnihna an thah atanga minute thum a liam leh hmain Federico Valverde mikhual siphurh pakhat zawk a sut then a; chawlhlawk hma chiahin Real tana goal khung mar rei tawh tak Jude Bellingham a inlar chhunzawm ve leh a, Rodrygo siamsak atangin mikhual siphurh a sut zo.
England midfielder Bellingham hian inelna hrang hranga Real Madrid game khelh hnuhnung pariatah game sarih chhung goal a khung tling a, La Liga bikah a zawna match ruk goal a thunna niin, season kal lai inelna hrang hrangah goal sarih a khawl tling ta a ni.
Ti hian, kum 21-a upa Bellingham hi kum 2016-a vul Karim Benzema hnu lamah Real Madrid player zinga a zawna La Liga match ruk chhung hoal khung leh thei hmasaber a ni.
Second half tir lam minute 56-ah Rodrygo chuan Madrid hmahruaina goal a thun ve ta thung a, mahse, he goal khat hi mikhual team-in an chakpui zo ta chuang lo a, second half laihawl khel thlen dawnah Isi Palazon chuan Real goalkeeper Thibaut Courtois-a dan zawh loh goal dang a tilut ve leh a, 3-3-in tea m pahnih an inthathen.
Second-half substitute Vinicius Junior chuan hun tawp dawnah Real chakna goal ni thei tur thunna hun remchang hmu bawk mah se Brazilian ball thawnluh kawh zet hi Rayo Vallecano goalkeeper Augusto Batalla chuan goal kham chungah a lo bengliamsak.
Tarlan tak angin, ke lama hliam a neih avanga France captain Kylian Mbappe chawlhtir a nihna game-ah Real manager Carlo Ancelotti chuan tlarhma lama a rohlu neih dang Vinicius Jr pawh starting eleven-ah a telh lo lehzel a, an mikhualte mualneitu team kha a zuam mah mah deuh em aw a tih theih!
League khelh 17 atangin Real khan point 37 nen table-ah pahnihna an luah chhunzawm a; Rayo erawh point 20 nen 13-naah an thu.
Mbappe tel loa chak zo lo Real
