Mbappe vangin Ronaldo record derthawng!
Calendar kum khat chhunga Real Madrid tana goal khung hnem ber Cristiano Ronaldo chuan kum 2013 khan Spanish giants tan goal 59 tehreng a puitlin a, chu record khum chu huphurhawm hle dawn awmin lang mah se Paris Saint-Germain atangin France captain Kylian Mbappe a lo lang a, he nau hian Nilaini Copa del Rey last 32 inkhel pakhatah goal hnih khungin Portuguese superstar tluk turin goal khat chiah a mamawh tawh.
El Prado stadium-a Bernabeu club-in mualneitu team Talavera laka 3-2 hnehna an chan zanah Mbappe hian goal hnih khungin, kumin kum kal laiah a club vawn lai tan goal 58 a khawl tling ta a, Real chu last 16 a luhpui bawk.
Kum 26 mi hian chawlhlawk dawnah penalty atangin mikhual team hmahruaina goal chhuihlutin, first half hun pekbelha defender Manu Farrando own goal nen Real Madrid hian half time-ah sihnih faiin hma an hruai phawt.
Mualneitu team beilet tan minute 81-ah Nahuel Arroyo chuan an siphurh pakhat zawk sut then mah se minute 88-ah Frenchman Mbappe bawkin a
goal hnihna khung chungin Real goal phai a chhungkhat a; hun pekbelh minute khatna a kal mek laiin Gonzalo di Renzo chuan Talavera goal hnihna tilut ve bawk mah se an siphurh sut zo turin hun a tam tawk ta lo a, Madrid-in round of 16 an lut ta tho a ni.
AS Monaco forward hlui Mbappe hian Inrinni La Liga match pakhata Real-in Sevilla an hmachhawn hunah goal khat a thun leh a nih chuan Ronaldo record a nihrualpui ang a, goal khat aia tam a tihluh phei chuan record dinglai a khum tawh dawn a ni.
Boss Xabi Alonso chuan Pathianni league-a Alaves hnehtu a first eleven atang khan player 10 chawlhtirin Talavera lakah a team nem zawk a luhtir a, bench-a thu zingah Jude Bellingham leh Vinicius Jr an tel.
Mbappe vangin Ronaldo record derthawng!
