Zarkawt BCA leh Zemabawk BC an tha fal
Hawla Indoor Stadium-a MBBA Favang Basketball tournament khelh mekah Zarkawt BCA in Saron BC leh Khatla TBL lakah awlsam takin hnehna an chang a; tun season-a an elpui tur bera tinzawn theih Zemabawk BC pawhin an match hmasa berah tun tournament a points nei hnem ber record 107 an siam nghal a, Chaltlang BC chu 107-79 in an hneh a, Chaltlang BC tan hian an khirh hret!
D League huangah Ramhlun SC chu veteran player chuai thei lo Michael F-a hovin an rawn thawk chhuak a, 85-84 in Tuikual South BC an hneh a, champion zia a ni.
Hetih mek lai hian Favang tournament-a points tam ber dawttu chu Chhinga Veng BC in an siam a, 104 -78 in an veng thenawm Electric BC an sawp.
Women’s lamah Bungkawn LB Associates chu tun dinhmuna an khelh dan thlirin an champion a rinawm nghal. 47-29 in Dawrpui Alpha an hneh.
Dawrpui Alpha hian Maxim SB chu 54-29 in an hneh zui ve leh si a, chhiarkawp dan atang chuan hmeichhe lam hi chu a lang fiah nghal ruak – game a nih miau thung avangin chiang hi a chiang lo fo thung!
MSL bik thlir thuak ila
Tualchhuang star player Kanan tlangval Nuna Chanmari BC tan a khel tha hle a; Zarkawt BCA star player thar Big Mike a hmuhnawm nghal hle bawk, beisei phak khumin Hunthar tlangval Chhunawma a rintlak fu.
Dawrpui Hotshots-ah R-a tha fal mah se, offense-ah thlawptu a mamawh tih a lang nghal. Zarkawt BCA head coach in player a zir uluk tih a lang a, an game a zia hle.
Ramthar Vanguard in season an hmang tha lo nghal a, Reuben-a hova team game an khelh chhuah a ngai – chak loh laia nui seng sung hmuh tur an awm, in siam that an mamawh.
Saron BC hian MSL a inhamtang turin squad an nei a, kumin hian champion trophy an chawi a rinawm loh. Chaltlang BC hi top 5 velah an langin a rinawm a, an hnuaiah Saron BC leh Ramthar Vanguard an awm a rin ngam.
Khatla TBL hi hriatthiam an har rih viau. Zarkawt BCA leh Zemabawk BC tan fimkhur tizual turin an la awm khiau. MSL 11 champion an nih kha vawng reng ila, Mizo palian pakhat Hlutea kianga ding tur an mamawh tih a hmuh theih. Zemabawk BC chu champion tura inkulh an ni a, an ti mai mai lo tih a chiang.
Favang inelna ah hian MSL huang bikah Khatla TBL leh Zarkawt BCA bakah Zemabawk BC ten Khuangchawi thla ah hian champion nomawi an chawi a rinawm.
MBBA Favang Basketball Tournament: Zarkawt BCA leh Zemabawk BC an tha fal
