Mizoram Basketball Association (MBBA) chuan veng/khua inelna July ni 3 atanga khelh tan turin ruahmanna a siam a, team 62 inziak lutin, June ni 27, zirtawpni zan dar 7 hian Hyve City Hall-ah khuhhawnna leh managers meet neih a ni ang a, tie draw neih zui a ni nghal bawk ang.
Mizoram Pumhuap inelna tur
Aizawl khaw chhung atangin veng 57 an tel dawn; chutih rualin, MBBA hnuaia district association nung ber Champhai atangin Champhai Vengthlang leh Champhai Kahrawt hmel kan hmu dawn a, hmel thar Thenzawl East hi an khel hmuh chakawm bik a ni.
MBBA hnuaia district association lian ber pawl leh player tha tamna Lunglei hi tunhnaia neih zawh tak U 23 lama an chetthat nen an hmel hmuh tur a awm dawn lo! Lawngtlai leh Saiha rawn thawkchhuak thei lo tur te, Saitual leh Mamit bakah district thawm na zet Kolasib an reh thiap mai hi an huamchhunga player-te tan zawhna a tam ang!
Heti khawpin ruihhlo in kan thalaite a suat a, a bawiah an tang thup a, a rampum buaiin kan buai a! Veng/khawtlang hruaitute hian nun kawng dik zawh mek, infiamna lama tuihalte hi kan thlawp a tul takzet. A chhe tawh aiin a la him thate enkawl kawngah hian inhuam kan ngai tlang e.
Veng/khaw tinah phut let nei miah lovin thalaite huikhawm peih Mizo hian kan la ngah hle a, heng mite rilruah hian professional player tura an naute chher hi a theih vek loh tih hriatna an kawl khiau a, hum sual an dai palh pawi theihzia an hriat avangin inelna thianghlim hmachhawn turin hun leh sum senso pawi ti lovin an veng/khua tan an rawn penchhuak thin – zah an phu e.
Mizo rilrem veng/khaw bil inelna
MBBA leh CYMA-in chhinchhiah zui tlak kum 2018 thleng khan inelna an lo buatsaih tawh thin a – Tuikual South, Chanmari, Saron, Champhai leh Madanrting (Shillong)-te khan chanchin ngaihnawm an hnutchhiah a, Republic veng leh Kanan vengin tawiawmtu an ngah thinzia te kha! Mizoram basketball iptepui banna, Babutlang, Zarkawtin an va thleng hneh thei tak!
Hun a kal zel a, mahni lansarhna umin social media hmangin zak hlei thei lo ten mi mit lak nan thawm an rawn nei lian a, chung mite lamah kan mitmu a fuk thup tak avangin mahni veng leh khua tana Mizo taka inelna tawiawmtu kan tlahniam ta!
A lem mai mai kan buaipui rah chu Mizoram pawn atangin MEDAL rawn awrh haw, kan hnam tihmingthatu an tlem ta pharh! A lem lem ni lovin, thil tak tak, hah leh thlantui luan zawih zawihna lamah hian kir a hun. Khua leh veng tana tang taka thapui nena che chhuak thinte ngei mai hi i ngaisangin i tawiawm thar leh teh ang u…
Kum 2018 atanga tun thleng!
MBBA lamin professional takin hisap a nei a, Mizoram Super League (MSL) a duang chhuak a – club intihsiakna lam a chawi sang a, kum 2018-a CYMA nen an thawhdun hnu khan Inter Veng/Branch YMA inelna lam a hawi ta meuh lo!
Chutih rualin, pawl leh veng bil anga Mizoram pumhuap inelna erawh MBBA hriatpuinaa siam tawk an awm ve reng a, club intihsiakna aiin hlut a hlawh zawk tlat!
Khawnawt leh veng pumhuapa inelna hi sports association leh veng/khua hruaitute tan enkawl kawngah senso a tam tham hma nang a, Mizo hlut ber a nih miau avangin MBBA lamin he lama ke a pen leh ta hi thutlukna fuh a ni.
Aizawl veng thenkhat tunhnaia hnuhma nei mawm zingah – Khatla South leh Bungkawn bakah Nursery vengte hi nomawi chawi tura rinkai an ni pha. Kanan leh Bethlehem Vengthlang champion dal thei tur erawh Zarkawt an ni.
Player that falna veng an tamin an inchawhpawlh rual tha tlang tawh a, team enkawltu tha erawh an pawimawh ang. A phur phur leh inpe ringawtin boruak sangah awmzia a nei tawk lo thin; in veng/khua khan coaching staff tha in neih loh chuan – bye, bye!
Hoops Mania Timeout
Zanina Inter Veng Khuhhawnna leh Managers Meet neih tura hun hman dan tur:
Date & Time: 27.06.25 at 7 pm
Venue: Hyve Aizawl City Hall
1st session
Host: Malsawmdawngi (Asomi)
Report: Pu Zomuanpuia, Gen Secretary
Khuhhawnna: Pu R. Lalnunpuia, President
(Solo , Fixture draw, Refreshments)
2nd Session (Managers Meet)
MBBA technical chairman Pu Jimmy Lalmalsawma kaihhruaina hnuaiah zawhna leh chhannate neih a ni ang.
MBBA Inter Veng 2025 Team 62 inlan dawn – players 900 chuang telna tur!
