Oil man tih san leh kawngpui chhia siamthat thuai phuta Mizoram Commercial Vehicle Union-in service loa lungawi loh an lantir chu a hlawhtlinga ngaiin an ruahman sa aia hma in an titawp. Lirtheia eizawngtu pawl intelkhawm, Mizoram Commercial Vehicle Union (MCVU) chuan an lungawi lohna lantirin Nilaini zing dar 6.00 atanga tlai dar 6.00 thleng service loh nise, tiin an tlan loa; hemi chhung hian hmun thenkhatah duty indahin, pawl huapa an hmalakna zawm loh tum loh thu sawi si lo, commercial vehicle tlan chhunte an tlan chhan an lo zawt thin a, police lam pawh duty-in, boruak muanawm lo a thleng lo tih thu dawn a ni.
Hetihlai hian Aizawl bikah chuan four wheeler taxi leh two wheeler taxi-in MCVU lungawi loh lantir hi an thlawp loa; city bus-chuan thlawp mah se, sawrkarin MST bus a service tir a, kohhran bus thenkhat pawhin an tlan dan hun pangngai nangpha zirlai leh mipui chu a remchan anga an phurh bawk avangin mipui nawlpui nunphung a buai lutuk lo nia sawi a ni.
Lungawi loh an lantir hi a hlawhtling thawkhat nia ngaiin MCVU chuan ruahman sa aia darkar hniha hma in, Nilaini tlai dar 4.00 khan lungawi loh lantir hi an titawp a ni.
MCVU-in an hun ruahman sa aia hma in lungawi loh titawp
