Mizoram Legislative Assembly inthlan pui 2023 lo awm tura thuthar thehdarhtute hriattur pawimawh inhrilhna leh zirhona sensitization workshop chu nimin khan Chief Electoral Office, Mizoram huaihawtin ICT Conference hall-ah neih a ni.
He hun kaihruaitu H. Lianzela, Addl. CEO chuan inthlanpui inpuahchahna kal mekah mi tam berin vote an thlak theih nan voters awareness kalpui a nih thu sawiin, chumi hlawhtlinna tur chuan media-te an pawimawh tih a sawi a. Election Commission of India-in media a ngaihpawimawh thu sawiin, Media platform hrang hrang kaltlanga voter awareness kalpui chu ECI duhdan a ni a ti. Mizoram chu vote thlak thatna state, inthlanna muanawm leh felfai ni thei tura theihtawp chhuahpui turin media kalkhawmte a sawm a; tan lam nei lo tur leh, thu dik leh finfiahte chauh puangzar thin turin a chah bawk.
Inthlan chungchanga mipui zirtir kawnga ni tin chhuak chanchinbute inelna CEO Office-in October ni 26 atanga November ni 6, 2023 thleng a buatsaih tur thu H. Lianzela chuan a sawi a. November ni 6 leh ni 7, 2023 ahte editorial kaltlangin politics rawng kai lo vote thlak tura mipui zirtirna thailang turin a ngen bawk.
Vote tla zat a san theihna turin state pawn leh hmun danga awmte’n vote thlak an ngaihpawimawh nan leh vote thlak ni chu hlawh kiam chuang lova chawlh, ‘paid holiday’ ah sawrkarin a puan avangin sawrkar hnathawk mai bakah, awmpui nei leh an hnuaia chhawr neite’n an ngaihpawimawh theih nana tanlakpuiah a sawm nghal bawk a ni.
Sensitization workshop-ah hian resource person paliin thupui hrang hrang hmangin inthlan kaihhnawiha media-te tana hriattur pawimawh an sawi a. Dr. Lallawmkima, IPRO chuan thupui “Media/Social-media related issues” chungchang a sawi a; Vanlalringa, Sr. Informatics Officer chuan “cVIGIL/KYC & Helpline apps” sawiin, H.Vanlalruatfeli, Programmer, CEO Office chuan “Suvidha & Candidate apps” chungchang sawifiahin, Zonun Sanga, Addl. SP, CID Crime chuan “Offences related to media during elections” chungchang a sawifiah bawk.
Media-te pualin inthlan chungchang zirhona huaihawt
