Pathianni khan Vien-na Open 2023 mipa final khelh a ni a, inkhel hmuh-nawm takah Jannik Sinner chuan champion lai Daniil Medvedev a hneh a, a champion.
Final-ah hian champion lai Danill Medevev-a’n bul a tan tha a, set khatnaah 3-1 in hma a hruai hman. Set lak theihna hun remchang nei bawk mah se a serve a hum zo lova, tie-break khelh a ngaih phah. Tie-break-ah an inum zak zak hnuin Sinner a che fuh a, set la hmasa zawkah a tang.
Set khatna a hloh hnuin Medvedev a insiamtha a, set hnihnaa a khel tha ta viau. Russian star Medvedev hian break a neih a chhawr tangkai a, game li hloh chungin set la let. Set khat ve ve an lak hnuin deciding set khelh chhun-zawm a ni a, champion tur zawk tihchianna set pawimawh takah Sinner a chungnung a, game thum chiah hloha set la nawn lehin 7-6 (9/7), 4-6, 6-3 in a chak a, a champion a, season kal meka a title palina a hlawhchhuak.
Jannik Sinner leh Daniil Medvedev te hi tunhai chawlhkar thum chhunga vawi hnih an intumna a ni a, an intum hnuhnung pahnihah hian Sinner a chungnung ve ve. October thla tir lamah khelh Beijing final-ah a chak hnuin Vienna Open-ah a hneh zui leh bawk. Tunhnaia chetha pahnihte Sinner leh Medvedev te hian Paris Masters an hmachhawn zui leh ang a, Turin khawpuia khelh tur ATP Finals khel turin an tling ve ve tawh bawk.
Medvedev hnehin Sinner a champion
