Meghalaya-a honeymoon hmang inthahna chhui zel

Meghalaya-a honeymoon hmang inthahna chhui zel
Meghalaya Police special investigation team chuan tun hnaia man chhuah, an state chunga a pasal thata puh, Sonam Raghuvanshi-i leh mi dangte chu an chet dan an chhui zui zel a, Nilaini khan tual chhung court-ah an hruai bawk.
Meghalaya Police hian an thil chhui hmingah hian ‘Operation Honeymoon’ tia vuahin Thawhlehni khan Indore leh Ghazipur-ah an mi rinhlelhte chenna in leh hmun dang dang an dap leh tih an sawi.
“Uttar Pradesh leh Madhya Pradesh-a Sonam-i leh mi dangte hmunhmaah hian Indore sumdawng, Raja Raghuvanshi-a thahna finfiahna dang eng emaw zat hmuh belh a ni,” tiin police officer-in PTI a hrilh.
SIT hian Indore-a a titu nia an hriatte ni ruk kawl phalna neiin Sonam-i, he tualthahnaa mawhphurtu bera puh erawh ni thum kawl phalsak an ni.
Sonam-i hi Indore-a man a nih hnuah LGBI Airport, Guwahati-ah phurh thlen niin Shillong panpui leh a ni a, Thawhlehni zanlai vel khan an thleng.
SIT hian ‘tualthahna thlen dan leh a chhan chan thattir’ an tum a, an thubuai chhui lai chu a la khirh rih deuh tih an sawi.
An sawi dan chuan Sonam-i hian a pasal a thah hnuah tual chhung taxi manin Guwahati a thleng a, relin an khua a pan zui a ni.
A thawhpui mi dang pathum, man vek tawhte pawh hian tourist taxi hmangin Guwahati an pan a, relin Indore an pan niin an sawi bawk.
“Sonam-i hian Mawkdok atangin taxi hi a man a, Guwahati-a tual chhunga tlan rela a chuan hnuah chhukin rel dangin Indore a pan zui a ni,” tiin East Khasi Hills district Superintendent of Police Vivek Syiem chuan PTI a hrilh.
Mawkdok hi Sohrarim bula khualzinte tlawh thin hmun a ni a, Shillong atanga an nupaa scooter an hman pawh he hmunah hian hnutchhiahin a awm a ni.
DGP I Nongrang-a chuan kum 24 mi, Sonam-i hian a pasal, Raja Raghuvanshi-a hi Sohra, Meghalaya-a honeymoon an hmanna hmunah a that nia an hriat thu Thawhtanni khan a sawi a, state pathumah a titu an zawn nasat thu a sawi bawk.
Raja-a thattu takte hi mipa pathum, Sonam-i mi tirhte an ni a, amah hi ‘a chin hriat loh’ a ni zui a. A mi tirh pathum – Akash Rajput , Vishal Singh Chauhan leh Raj Singh Kushwaha te hi Pathianni zana man an nih hnuah Thawhtanni khan Sonam-i pawh hi Uttar Pradesh-a Ghazipur-a Nandganj Police Station-ah a inpe zui ta a ni tih police-in an sawi.
An nupa hi May 11-a Indore-a innei kha niin honeymoon hmangin Meghalaya-ah hian an zin a. Nongriat khuaa homestay-ah thlengin May 23 khan an chin hriat loh an ni zui a, ni 10 hnu, June 2 khan an thlenna atanga km 20-a hlaah a pasal ruang hi hmuh a ni ta a ni.
Raja-a hi a chhungten a ban ding lama a tattoo atangin an hre thei a. Hmeichhe kawr var, damdawi, mobile phone LCD screen thenkhat leh smartwatch an hmu tel bawk.