Meikhu vangin Canada leh US-ah inralrinna dar khawng

Meikhu vangin Canada leh US-ah inralrinna dar khawng
Ram kang khu avangin Canada leh United States hmar lamah boruak chhia vanga inralrinna dar khawn a ni a, mi chengte chu ‘pawna awm tam lo’ tura ngen an ni.
Environment Canada chuan inralrinna hi Ontario pum deuhthawah a puang a, ram kang khu chuan boruak thianghlimna a tihniam hle tih an sawi a. Thawhtanni khan Toronto-ah chuan boruak thianghlim dan chu khawvel pumah a chhe ber pawl a tling.
US-ah chuan thuneituten Thawhlehni zan (India-a Nilaini chawhma) thleng atan Chicago-ah inralrinna a tiri a, naite leh upate tan inkaihhruai hran an tichhuak bawk.
Prime Minister Mark Carney chuan Ottawa dinhmun sawipuiin rikrum hmachhawntute a kawm a, hetih lai hian Manitoba, Saskatchewan leh Ontario hmar lama ram kang avangin mi sang telin an in an chhuahsan mek.
“Boruak a bawlhhlawh nasat chuan tute pawh pawnah awm tlem tur a ni,” tiin Environment Canada chuan Toronto tan inralrinna bik a tichhuak a. “Pawn lama infiamna, chet velna leh thil tih turte tihtlem leh a hun sawn a ngai a ni,” an ti.
Upa, nau pai lai, nausen leh naupang, natna nei sa leh thawk lama harsatna nei hma bikte chu mei khu avang hian an dinhmun a derthawng zual tih an sawi bawk.
Inralrinna hi an ramria Chicago-ah puan a ni bawk a. “Air Quality Alert hi Illinois-a Chicago khawpui huam leh Indiana hmar lam tan Thawhlehni zan thleng atan Canadian ram kang khu avanga a him loh theih avangin puan a ni,” tiin National Weather Service Chicago chuan X-ah a tar lang.
Canada-a ram kang hian ram hectare sang tel a kang chhe tawh a. May leh June hi Canada khawthlang lama ram a kan duh zual lai a ni thin a, mi 30,000 vel Saskatchewan leh Manitoba province-ah an insaseng tawh a, tual chhung thuneituten emergency an puang.
Khawchhak lamah Thawhtanni khan Newfoundland-a Bonavista peninsula-ah ram kang tharin zan khat thil thuah a leta zau a kang hman a, Chance Harbour bula cabin tam tak a kang chhe nghe.
Scientist-te chuan ram kang nasa hi sik leh sa inthlak nasa nghawng chhuahah an ngai.
Canada hi khawvel pum lum dan chawhrual aia a let hniha lum tura ngaih a ni a, a Arctic region lai phei chu khawvel lum chak zawng aia a let thuma lum chak turin scientist-ten an sawi lawk a ni.