Meitei paruk thahnaa bultumtu zinga mi nia hriat man

Meitei paruk thahnaa bultumtu zinga mi nia hriat man
Jiribam district, Juribam-a Meitei paruk thahnaa inhnamhnawih lian ber nia hriat chu National Investigation Agency (NIA) leh Assam Police tanghovin Cachar district, Assam-ah Ningani khan an man tih police-in an sawi.
An mi man hi Boya tia an koh, Thanglienlal Hmar a ni a, Moinathol khua, Jiribam-a cheng niin thu an dawn bawhzuiin an man tih Cachar Senior Superintendent of Police Numal Mahatta chuan thuthar lakhawmtute hnenah a hrilh.
Hmar hi hmeichhia pathum leh naupang pathum thahnaah hian ruk bo hmasak an nih theih nana buaipuitu leh thah an nihnaah pawh inhnamhnawih nia hriat a ni tih Mahatta chuan a sawi.
“An mi rukte hmun danga phurhnaah leh a thattute pawh an dahna hmuna hruaitu nia hriat a ni,” a ti.
A lawngleng hmangin an mi thahte leh ralthuam keng mi pathum, camouflage uniform-a inthiamte chu Jakuradhar Ghat atangin Kaisalpunjee, Ghat, Jiribam district thleng a phur niin a sawi.
NIA hian thla eng emaw zat Hmar chet velna hi chhui zuiin an man ta hi he thubuai an chhuinaa hlawhtlinna pawimawh tak a ni.
“He inthahnaa inhnamhnawihte zawng zawng hi mana hremna pek vek an ni dawn a, central agency pawh kan pui zel a ni,” tiin Mahatta chuan a sawi.
Hmar hi NIA-in an kawl a, pawi an khawihnaa a tihpuite leh an chet dan leh tul dang thu an zawt mek.
An mi thah nia sawite hi a hnuah hmuh niin an ruangte hi nikum November khan Assam-Manipur ramri hrul hmun thumah chhar an ni.
Mi paruk ruk bo an nih ni hian venhim hna thawktute nen an inkahnaah hel pawla mi nia hriat 10 kah hlum an ni bawk a, an ruangte chu post-mortem examination turin Assam-ah lak a ni.
He thil thleng hian Manipur-a hnam hnih intibuai mek, Meitei leh Kuki-Zo inkarah boruak tisosang lehzualin Assam pawh a kang kai a ni.
Assam sorkar pawhin ramriah venhimna pawh a tihkhauh lehzual phah bawk.
Union home ministry chuan December thla khan he thubuai hi NIA chhui turin a ti a, central agency hian inthahnaa inhnamhnawih mi eng emaw zat hming a puang tawh.