Meitei community te Scheduled Tribe list-a telh tumna rawtna chu tun hnai kum sawm li chhungin tum hnih kalpui niin hnawlin a awm ve ve tiin The Hindu chanchinbu chuan a sawi.
Kum 1982 khan Office of the Registrar General of India chuan a hnawl a, kum 2001 khan Government of Manipur chuan a hnawl leh bawk a ti a.
Union government leh Manipur sorkar chuan he mi chungchang hi State a buaina nasa tak a chhuah luih luih lai pawhin an sawichhuak duh miah lo va, chu mai bakah Meitei tena ST list-a tel duha petition Manipur High Court-a an thehluhnaah pawh heng record te hi an sawi lang duh lo a ti bawk.
Chu mai bakah Tribal Affairs Ministry officials te chuan heng historical documents te hi kumin April thla tawp lam khan Manipur High Court-in Meitei te hnena ST status pek tura recommendation a thawn ni tuk lawkah hriatchhuah a ni a ti bawk a. Delhi-a officials-te chuan heng files kaihhnawihte hi Meitei demand chungchang an zirchianna lama an hmuh a ni a ti bawk.
The Hindu chuan Right to Information Act, 2005 hmanga record a dil chhuahah RGI office chuan ST list-a Meitei dah tura ngenna chu kum 1982 khan Ministry of Home Affairs-in a ngaihtuah a ti a. Chutah chuan ‘information awm ang’ atang chuan Meitei community te chuan tribal characteristics an nei lo a ti a ni, a ti bawk a. Chuvang chuan ST list a tel tura nawrna chu hnawlin tun hma atang tawhin Meitei tih chu ‘Manipur valley a non-tribal population’ sawi nana hman a ni a ti bawk.
A hnu kum 20 dawn hnuah khatih laia Ministry of Social Justice chuan States leh UT a SC/ST list a ennawnnaah Manipur sorkar atangin rawtna a ngen a. Chutah chuan tribal Development Department of Manipur chuan January 3, 2001 khan Centre hnenah chuan kum 1982-a Meitei status chungchanga RGI office dinna chu an thlawp tiin a hrilh a ni.
Chumi hnuah Manipur sorkar Chief Minister W. Napamacha Singh kaihhruai chuan Meitei community te chu ‘dominant group’ an ni tia sawiin hei vang hian ST list-a an awm a ngai lo an ti bawk a. Chu mai bakah Meitei te chu Hindu tak mai tia sawiin ‘Hindu Castes a Kshatriyas Caste status nei’ tia sawiin Other Backward Classes ah list tawh sa zawk an ni, a ti bawk.
Union government chuan heng record te hi Meitei petition Single-Judge Bench of Acting Chief Justice M.V. Muralidharan-a’n a ngaihtuahnaah a theh lut miah lo tih a ni bawk a.
A hnua review leh appeal thil kaihhnawih Manipur High Court-a thehluhah State leh Union government chuan Meitei te ST status chungchangah ziakin an la thehlut lo bawk.
Tribal-a indahlut tur hian State sorkarin rawtna a siam hmasak phawt a ngai a, chumi hnuah RGI office ngaihdan lak leh tur a ni bawk. Constitution chuan thutlukna siam theitu chu parliament chauh a ti thung.
ST list-a awm tur enfel tura RGI office hman tur tih chu kum 1965-a Lokur Committee-in a rawtna a ni a. Chutah chuan tehna hrang hrang siamin a awm a ni.
Scheduled Tribes te puan leh thlan dana tehna thlak tur tih chu kum 2014 khan Narendra Modi kaihhruai sorkar hnauia Ministry of Tribal Affairs chuan a rawt a. Mahse, kum riat chuang ngaihtuah a nih hnuah pawh rawtna mumal a awm thei lo a ni.
Tuna Manipur buaina chhan ber pawh hi Meitei tena Scheduled Tribe list a tel ngiata hma an lak vang a ni ber a. Hei hi duh lovin Manipur a Tribal inzawmkhawm te chuan ‘Tribal Solidarity March’ an huaihawt a, chu chu buaina chhuahna chhan a ni ta a ni.
Manipur-ah hian phaizawl-ah Meitei te an cheng a, population atanga 53% vel lawih an hauh bawk a. Tribal te chu Manipur tlangram zawngah an cheng thung a, chung zingah chuan Kuki leh Naga te chu a tam ber an ni bawk.
Meitei te ST list-a telh tumna \um hnih lai hnawlin a awm tawh tih lailang
