Melbourne-a Gandhi lim bo, zawng hmu ngei turin India-in ti
Australia-a Melbourne khawpuia Mahatma Gandhi lim chu ruk a ni a, India chuan a dem thu sawiin Australian thuneitute chu zawng chhuak ngei turin a ti.
Australian Indian Community Centre-a dah Gandhi-a lim hi January 12 zinga bo tawh kha nia hriat a ni tih Australian chanchinbute chuan an sawi.
Victoria state-a Knox Crime Investigation Unit chuan bronze-a siam milim hi hmuh chhuah ngei tumin a chhui hna an thawk mek.
“Mi tu tih hriat lohten Rowville, Melbourne-a Australian Indian Community Centre-a dah Mahatma Gandhi-a lim an sawisaa an la bo hi kan dem hle a ni,” tiin Indian external affairs ministry thupuangtu, Randhir Jaiswal-a chuan Thawhlehni khan a sawi.
“He thil thleng kan demna leh duh lohna hi na takin Australian thuneitute hnenah pawh thlen a ni a, rang taka hmu chhuak leh tura che nghal tur leh a titute pawh an phu tawk hremna pe ngei turin kan ti a ni,” tiin Jaiswal-a chuan a sawi.
Milim hi kg 420-a rit niin a dinna (base) atangin angle grinder hmangin tan a ni a, a ke chauh a awm tawh a. Police chuan mi pathum, tute nge an la nih chiah loh rinhlelh an nei a, tual chhunga thir lam chi hlui lei khawm thinte chu milim ang chi an hnena zuar an awm chuan lo ngaihven tha turin an chah.
Gandhi-a lim hi Indian Council for Cultural Relations (ICCR)-in Australian sorkar hnena an pek niin kum 2021 khan khatih laia prime minister, Scott Morrison-a’n India leh Australia inlaichinna thatzia lantir nan a hawng nghe nghe.
Melbourne-a Indian hruaitute chuan pawh Gandhi-a lim bo hian a barsakhaih hle a, hnam hmun pawimawhte chu a venhimna khauh zawk pe turin sorkar hnenah pawh an thlen.
Tuna bo ta milim tho hi a hma pawhin suasam tawh a ni a. Kum 2021-a hawn a nih tukah chiah khan mi tute nge an nih hriat lohten an lo suasam tawh a, Australia leh India chuan a hranin demna thu an lo chhuah tawh nghe nghe.
Melbourne-a Gandhi lim bo, zawng hmu ngei turin India-in ti
