Pathianni hian Australian Grand Prix an tlan dawn a, a rilphir zai avanga chawl Ferrari driver Carlos Sainz chu Melbourne tlankawnga inlan turin a inbuatsaih mek.
Nikum driver’s championship-a pasarihna luahtu Spaniard Sainz hi tunthla tir lama Saudi Arabian GP-ah khan a inlan thei lo a, a aiah Briton rawlthar kum 18 mi Oliver Bearman a inlan.
Jeddah tlankawnga a F1 debut-ah Bearman kha point thawkchhuak pha zawngin pasarihnaah a thleng a, a senior Sainz a rawn fit leh takah chuan Formula 2 lamah a kirleh rih phawt dawn a ni.
Ferrari thuchhuah chuan Melbourne tlankawnga Carlos Sainz-a car khalh leh lai hmuh an inbeisei thu tarlangin, vawiin hian first practice an tan ang a, Pathianniah race thlir tur a awm ang.
Thla hmasa season-opening Bahrain GP-ah khan Sainz hi pathumnaah thlengin, Red Bull driver pahnih Max Verstappen leh Sergio Perez-te hnung dawltu a ni.
Saudi Arabia-ah pawh Red Bull bawkin one-two finish an hlawhchhuak leh a, Arab tlankawngah khan Sainz inlan thei lo mah se a team-mate Charles Leclerc chu pathumna a ni ve thung.
Ferrari team principal Fred Vasseur chuan race hmasa pahnih ang bawkin Melbourne tlankawngah pawh lawmman semna dawhsan chuankai leh ngei an inbeisei thu a sawi.
Melbourne-a kir hman inbeisei Carlos Sainz
