Messi chelh theih inring Inter Miami
Club World Cup khelh meka match li khel kim vek Lionel Messi chu a club vawn mek Inter Miami chuan contract thar ziahpui theih ngei an inbeisei tih an sawi.
Kumin December thlaa a contract neih lai hmang zo ve tawh tur Argentina captain hi kum 38 mi lai ni tawh mah se Miami chuan an la ngaihlu vet vet hle a, tunlai hian United States-a cham zui turin inbiakna an kalpui mek a, hlawhtlin ngei pawh an inbeisei.
Miami leh Major League Soccer (MLS) marquee player chhawr zui zel an inbeisei thu hi club official-te chuan media hriatah an sawichhuak hreh lo a, official-a puanzar tak tak engmah awm lo mah se Messi lam pawh hian Saudi Arabia lam atanga sawmna mawm mangkheng dawng mawlh mawlh mah se contract pawhsei lam hi an awn zawk niin a lang ve bawk niin media lamin an tarlang.
A hma atanga sawirik awm ve pakhat chu Messi nupui hian a fate zirna leh khawsakna zawn hrim hrim atang pawhin United States-a chen hi a duh a, hei hian pa ber pawh a hmin hle anih hmel a, sum tam lutuk nena Arab lamin an dawr ve reng chung pawhin Miami khaw lam an pan ta kha a ni a, MLS club lam an lo inrintawk ve bawk avangin a cham zui lo ang tih sawi theih a ni lo.
US leilunga Messi tui viauna tur chhan dang leh chu nakkum Fifa World Cup thlengtu tur ram pakhat niin, Argentina tan title humhim turin a han bei lehzet ang a, an champion nawn leh emaw champion tawh lo emaw pawh ni se North America leilung atang ngei hian a international career a zial ve tawh tura ngaih a ni.
Inter Miami-a hun rei vak lo a khawsak chhung mai pawhin Messi he club tana goal khung hnem ber a ni der tawh a; a club vawn lai tana goal 50 a thun tawh zingah tunhnai Club World Cup match pakhata Porto laka a free-kick chhuihluh kha a tel nghe nghe.
Miami hi Atlanta khuaa mipui 65,574 zet pungkhawm hmaah si lio faiin European champion Paris St-Germain chuan an sawp a, Club World Cup atangin an tla ta a nih kha…
Messi chelh theih inring Inter Miami
