Messi hoa chak zo lo Inter Miami

Messi hoa chak zo lo Inter Miami
Tunhma lama a khel thei an la tlem lai khan Lionel Messi hian Fifa Club World Cup-ah goal nga lai a lo thun ve tawh a, Inrinni zanah erawh Inter Miami thuam inbel chungin Miami khawpuia Hard Rock Stadium-ah Argentine hian goal a khung zo lo a, Arab team Al Ahly nen goal awm loin MLS club hi an inhnehtawk ringawt!
Team khel thei tur zat tipung chiama club 32 zetin Club World Cup an khelh vawikhatnaah host city side Inter Miami hian mipui 65,326 lenna Hard Rock Stadium-a inkhel entu mipui 60,927 pungkhawm zingah tantu an ngah zawk ngial mah se supporter ngah ringawtin American team a chhan zo lo a, Argentine legend Messi meuh pawhin Egyptian giants Al Ahly lakah goal a khung zo lo!
Miami lam khan an goalkeeper vangin point khat an hlawhchhuak thei hram ti pawhin a sawi theih a; man of the match atana an thlan tak hial Oscar Ustari khan penalty vawi khat telin vawi duai lo ‘save’ a nei mawlh mawlh a, chuti ni lo se Messi leh a pawlte kha tlawm chunga tournament bul tan thei hial tur an ni!
Ustari penalty dansak chhuihtu hi Al Ahly player Trezeguet a ni.
Messi hian second half-ah free-kick atanga goal thun theihna hun remchang hmuin a hlawhtling zo lo a; hun tawp dawnah chakna goal ni thei tur long-range strike hmangin a zawng leh a, mahse, Mohamed el Shenawy chuan lo dangin crossbar a fuh a, Argentine goal lawm tur a awm lo tluanchhuak ta a ni.
Miami khawpuia an inkhelhna South Beach area vel kha venhimna an uluk hle a, a chhan pawh tunlaiin ramdang mi thawnhaw chungchangah America ramin harsatna lian tak a tawk mai a, thawnhaw duh lo lamin sawrkar laka lungawilohna an lantir a, Miami khawpuiah pawh Inrinni khan protester 1,000 vel lai an pungkhawm a, buaina lian tham erawh chhuak sawi tur a awm lo.
US khawpui hrang hrangah buaina a chhuak a, MLS club leh African team inkhelhna Miami khawpui atang hmar lam mel 70 (110 km) vel lekah khan US President Donald Trump-a chawlh hmanna in ropui Mar-a-Lago estate a awm bawk avangin Miami khaw inkhel lian atan pawh venhimna an uluk hle a ni.
Security tight zet hnuaiah Al Ahly supporter-te’n inkhelh hmain thlamuang takin lunch an ei a, drink an chen bawk a, big game-ah Messi captain-na team an la inhnehtawkpui bawk a ni.
Egyptian club kha African Champions League title la chunga Club World Cup khel tura tling chho an ni a; an ram lamah chuan record an nei tha chungchuang hle a, league championship title 45 la tlingin, Africa khawmualpuia trophy la hnem ber (12) niin, khawvel huap inelna lamah erawh chhuan tur an la nei lo thung.
Inrinni inkhel kha a hmunah Brazil legend Ronaldo leh Fifa president Gianni Infantino-te bakah footballing icon dang Italian legend Roberto Baggio-te’n an thlir a, mahse, football palian pathum hmaah ‘Messi magic’ hmuh tur a awm ta chiah lo!
Miami khelmuala inkhel entute’n ‘Messi 10’ shirt an ha nasa hle a, stadium chhungah “Messi, Messi, Messi” tia au thawm ri hulh hulh hriat tur a awm deuh reng bawk a, kum thum kalta Qatar ram World Cup-a Argentina a champion-pui tum ang deuh thaw khan fans lamah Barcelona forward hlui boruak a lian leh.
Inter Miami khelmual Chase Stadium chu mipui 21,550 lenna niin, kum tluana an club inkhel entu zat chawhrual chu mi 20,663 an ni a, chutih laiin Inrinni zana an inkhel entute chu a let engemawzata tam an ni.
Club World Cup kal mekah nimin khan Champions League winners Paris St Germain leh Atletico Madrid intumin, anni bakah hian German giants Bayern Munich leh Auckland City inkhel result pawh tarlan hman a ni lo.