Football huanga mimal chawimawina ngaihhlut hlawh ber Ballon d’Or chu thawhtan zan khan Theatre du Chatelet, Paris-ah semchhuah a ni a. Rinlawk ang ngeiin Lionel Messi chu chuan a vawi riat nan Ballon d’Or a dawn a. Hmeichhe lamah Spain midfielder Aitana Bonmati chuan Women’s Ballon d’Or a dawng bawk.
Ballon d’Or vawi sarih dawng tawh a, he chawimawina dawng ngun ber ni mek Lionel Messi hi a vawiriat nana Ballon d’Or dawng turin a elpui lian Erling Haaland leh Kylian Mbappe te a khum a, chawimawina ngaihhlut hlawh a dawng nawn leh. Football a inelna hlu leh ropui ber World Cup 2022-ah Messi hian Argentina a champion pui a. World Cup-ah hian goal sarih a thun a, assist vawi thum neiin, Best player-ah thlan a ni bawk. Season liam ta chhung khan club leh ram tan goal 38 a thun a, assist vawi 25 a nei tling bawk.
Footballer ropui ber ang hiala ngaih Lionel Messi hian kum 2009 khan a vawi khat nan Ballon d’Or a dawng a. Kum 2010, 2011, 2012, 2015, 2019 leh 2021-ahte dawng zui lehin kum 2015 khan Ballon d’Or dawng ngun ber record a lo siam tawh a. Kum 2023-ah vawi riat nan a dawng leh ta a, hei hi Ballon d’Or a dawn hnuhnung ber a nih a rinawm hial tawh. A elpui lian, Ballon d’Or vawi nga dawng tawhtu; Cristiano Ronaldo nen an inkar a tizau a, Ronaldo ai hian vawi thum ngawtin Ballon d’Or a dawng hnem ta hial a, a record hi khum har hle tawh tura ngaih a ni.
Ballon d’Or 2023 dawng tura rinkai zual pakhat chu Manchester City leh Norway forward Erling Haaland a ni. Haaland hian season liam ta khan Manchester City chu Champions League, Premier League leh FA Cup-ahte a champion pui a. Premier League leh Champions League-ah topscorer a ni nghe nghe. City tan hian inelna hrang hrangah vawi 47 inlanin goal 52 zet a thun tling. Club tan hlawhtlinna hrang hrang a chan vangin Ballon d’Or dawn a phu hle a ngaih a ni a. Season liam ta chhung khan FIFA World Cup a awm miau vangin World Cup champion Lionel Messi a nekchhuak zo lova, Ballon d’Or dawng turin a hun a la thleng rih lo. Ballon d’Or dawng ta rih mah se Haaland hian ‘Gerd Muller Trophy’ a dawng tho thung.
Real Madrid leh England midfielder Jude Bellingham chu kum 21 hnuai lama player tha berah thlan niin ‘Kopa Trophy’ a dawng a. World Cup-a Argentina champion puitu Emiliano Martinez chu goalkeeper tha berah thlan niin ‘Yashin Trophy’ hlan a ni a. Season liam taa Treble champion Manchester City chu ‘Team of the year’ ah thlan a ni bawk.
Hmeichhe lamah rinlawk ang ngeiin Euro 2023-a Spain champion puitu Aitana Bonmati chuan a vawi khat nan chawimawina ngaihhlut hlawh Ballon d’Or a dawng.
Messi kutah Ballon d’Or
