Messi leh Busquets zawm tur Alba

Messi leh Busquets zawm tur Alba
Barcelona lamah an khelho tawh a, tunah Spain defender Jordi Alba chuan a Barca team-mate hlui pahnih Lionel Messi leh Sergio Busquets zawm turin Inter Miami-ah contract a ziak ve leh ta tih club president Jorge Mas chuan a puang.
Mas chuan kum 34-a upa full-back an sengluh thar chuan karleh Thawhlehni khian Atlanta hma-chhawnin a club thar tan khelmual a lut tan dawn tih a tarlang tel.
Kumin nipui insuan hun laia a contract neih lai hmang zoa Bar-celona chhuahsan fel Alba hian kum 10 chuang Spanish giants thuam a inbel chhung khan match 259 khelin goal 27 a thun tling a, Nou Camp club chu La Liga title paruk a lakpui bakah kum 2015 khan Champions League trophy a sualchhuahpui a, Copa del Rey title panga, Spanish Super Cup pali leh Club World Cup trophy pakhat a lakpui bawk.
Major League Soccer club leh Alba-te’n inremna an ziah hma hian kum 36 mi Argentina World Cup winner Messi leh Alba ang bawka Spain international kum 35 mi Busquets chuan United States hi an lo thleng thla tawh a, tunah Barca star langsar pathumte hi US leilungah an khelho leh dawn a ni.
Kum 2025 thleng daih tur contract ziak ve ve Messi leh Busquets hi Pathianni khan an club khelmual DRV PNK Stadium-ah Inter Miami fans 20,000 vel fuankhawm hmaa phochhuah an lo ni tawh a, khami tum khan player lawmluttute zingah club neitu nihna nei ex-England captain David Beckham pawh a tel nghe nghe.
Tunkar Thawhlehni khan seven-time Ballon d’Or winner Messi hian a vawikhatna atan a Miami team-mate tharte kiangah training a zawm a, vawiin hian Leagues Cup game-a Mexico City khaw team langsar Cruz Azul an tum hunah a club thar tana a debut a nghakchhuak ang.
Hetih lai hian US chanchinbute tarlan danin, Inter Miami hian Catalan player hlui, kum 36 mi ni tawh Uruguay striker Luis Suarez lam an hawi leh mek a, Suarez hi Brazil club Gremio tana khel lai a ni.
Ex-Liverpool forward Suarez hian kum 2014 atanga 2020 chhung khan season ruk chhung Nou Camp-ah Messi, Busquets leh Alba-te hi a lo khelhpui tawh a ni.
He thu hi tunkartir lam Thawhlehni khan Mas chuan sawichhuakin, tun dinhmunah Luis Suarez lakluh chungchang an la sawi lo a, Gremio leh Suarez-te nen pawh direct-in an la indawr lo tih a sawi.
Mas chuan, “Luis Suarez hian Gremio a chhuahsan theih dan tur ka hre lo a, mahse, a chhuak thei a nih chuan Inter Miamia-a senglut turin inbiakna kan tan thei chu a ni mai dawn a, theih loh tih pawh a la awm lo,” a ti.
MLS team president hian TyC Sports-in an kawm tumin Paraguayan midfielder Diego Gomez pawh Libertad atanga an lakluh tur thu nemnghetin, Argentine club Racing Club nen Tomas Aviles sengluh dan tur an sawiho mek tih a tarlang tel.