Messi nena khelhdun leh duh Neymar
Karliamta Inrinni khan Brazil forward Neymar Junior chuan a hmalamah Inter Miami thuam inbela Lionel Messi nena khelhdun leh a duh thu a sawichhuak.
South American pahnih hi thian inkawmngeih tak niin, Barcelona leh Paris Saint-Germain lamah an lo khel dun tawh a, ram leh ram inelna zawnah erawh hmelma an ni thung!
Kumin nipui laia khelh tur Copa America-ah hian inhmachhawn leh tur an nih laiin nikum October thlaa a khup a tihnat avang khan Brazil international hian South America khawmalpui ramte football-a inelna lian ber hi a khelh theih a rinawm loh a, Messi nen khelmualah an inep thei dawn lo niin a lang.
Nikum nipui insuan hun laia Messi an sengluh hnu khan Miami hian Messi Barcelona team-mate hlui rualkhat – Sergio Busquets, Jordi Alba leh Luis Suarez-te chu squad-ah an senglut a, tunah Neymar chuan Messi hnungzuia Inter Miami tana khelh ve hun tur a thlir zui ve leh ta a ni.
ESPN Argentina lamin an kawmnaah Brazilian hi Inter Miami lama Messi-a’n a thinte a kawiluh dum dum chungchanga a ngaihdan leh Argentine nena khelhdun leh chungchang an zawt a, Neymar chuan, “Kan la khelhdun leh ngei ka beisei. Leo hi pa ropui tak a ni a, football bikah phei chuan mi zawng zawng hriat hlawh a ni a, tuna a khelh mekna hmunah hian a hlim niin ka hria a, a hlim a nih chuan kei pawh ka hlim a ni,” a ti.
PSG atanga sum tamna Arab lama insawn ta Al Hilal forward hi a khup hliam avang khan a la inkhel thei lo a, kumin August thla herchhuah hma chuan a kir hman a rinawm loh a, training pawh a la zawm theih loh avangin a hman viau rih niin a lang a, Inrinni pawh khan a hmuna Formula One Bahrain Grand Prix thlirtute zinga langsar pawl a ni!
Neymar hian hmaichhanah Formula One driver engemawzat a lo hmu tawh thin a, chu’ng zingah chuan tunlaia F1 driver lar ber tih ngam Max Verstappen pawh hi a tel nghe nghe.
Ti chuan, kan thu ngaiah kirleh ta ila, Neymar leh Messi hian PSG-a an awm lai khan league title hlawhchhuak nual mah se Ligue 1 club awh ber Champions League trophy erawh an hawnpui zo ta bik lo a ni.
Neymar hian PSG lama Messi nena an awmdun lai boruak sawichhuakin, hremhmun kaltlang ang mai an nih thu a sawi
South American pahnih hian nikum khan Paris club chhuahsan ve vein Messi chuan MLS lama kal a thlang a, Neymar chuan Saudi Pro League side Al Hilal-ah kum hnih daih tur contract a ziak thung.
Brazil tana goal khung hnem ber ni mek Neymar hian PSG-a a awm lai khan MLS lama khelh a chak thin thu a sawilang tel bawk.
Nikum khan football a chawlhsanna tur chungchangah Brazil club behchhan ngeia chawlh a tum em tih zawhna chhangin Neymar chuan, “Ka hre lo le. Ka ring lo lam mah a ni. Brazil ramah hian ka inkhel leh ngei dawn em tih ka chiang nga lo.
“US lama kal hi ka chak tlat mai a, season khat tal MLS han khelh ve hi ka thlahlel riau pek a,” tiin a chhang a, Messi nen Inter Miami lamah kawr inang an ha leh nge nge dawn niin a lang!
Messi nena khelhdun leh duh Neymar
